خبرنامہ بلوچستان

کوئٹہ:(ملت+اے پی پی) صوبہ بلوچستان میں کےپاک افغان سرحدی علاقے پنجپائی میں ایف سی نے بھاری مقدار میں دھماکہ خیز مواد اور اسلحہ برآمد کرکے دہشت گردی کا بڑا منصوبہ ناکام بنادیا۔ ایف سی ترجمان نے بتایا کہ سیکیورٹی فورسز نے نولہ کے علاقے میں آپریشن کیا جہاں سے 1800 کلو گرام دھماکا خیز مواد، 150 دیسی ساختہ بم (آئی ڈی ای) اور بڑی مقدار میں دیگر اسلحہ برآمد ہوا۔ ترجمان فرنٹئیر کور کا کہنا تھا کہ دہشت گرد اسلحہ اور دھماکا خیز مواد بلوچستان میں دہشت گردی کی کارروائیوں میں استعمال کرنا چاہتے تھے۔ ان کا کہنا تھا کہ سیکیورٹی فورسز نے یہ کارروائی خفیہ اطلاع پر کی تھی تاہم کوئی گرفتاری عمل میں نہیں آئی۔بعد ازاں دھماکہ خیز مواد کو ناکارہ بنانے کےلیے بم ڈسپوزل اسکورڈ کو طلب کیا گیا۔ رواں سال اگست میں انسداد دہشت گردی ڈپارٹمنٹ نے دعویٰ کیا تھا کہ انہوں نے ایک بڑی دہشت گردی کی کارروائی کو ناکام بناتے ہوئے افغان خفیہ ادارے کے ایک اہلکار کو گرفتار کرلیا۔ گزشتہ سال دارالحکومت اسلام آباد کے سیکٹر جی نائن میں سرچ آپریشن کرکے سیکورٹی اداروں نےدو افغان انٹیلی جنس اہلکاروں کو گرفتار کیا تھا۔