خبرنامہ بلوچستان

کوئٹہ۔(ملت آن لائن) مچھ کے قریب پٹرول سے بھری تیز رفتار وین بے قابو ہوکر ٹرک سے ٹکرا گئی جس کے باعث دونوں گاڑیوں میں آگ بھڑک اٹھی۔ آتشزدگی کے نتجہ میں6 افراد جھلس کر جاں بحق جبکہ 4 زخمی ہوگئے۔ پولیس کے مطابق پیر کی صبح مچھ کے قریب کوئٹہ سبی شاہراہ پر پٹرول سے بھری وین تیزرفتاری کے باعث ڈرائیور سے بے قابو ہوکر ٹرک سے ٹکراگئی جس کے باعث آگ لگنے سے 6 افراد جھلس کر جاں بحق جبکہ پولیس اہلکاروں سمیت4 افراد پولیس سارجنٹ رب نواز، سارجنٹ خالق، سعید احمد اور محمد اخترجھلس کرزخمی ہوگئے۔ نعشوں اور زخمیوں کو سول ہسپتال مچھ پہنچادیا گیا جہاں زخمیوں کو ابتدائی طبی امداد کے بعد کوئٹہ ریفر کردیا گیا ہے۔آگ لگنے سے قریب سے گزرنے والی 3 گاڑیاں اور پولیس چوکی بھی جل کر خاکستر ہوگئی۔ آگ کے باعث کوئٹہ سبی قومی شاہراہ پر ٹریفک کی روانی بھی بری طرح متاثر ہوگئی ۔مقامی انتظامیہ نے فائر بریگیڈ کی مدد سے کئی گھنٹے کی جدوجہدکے بعد آگ پر قابو پالیا ہے۔