خبرنامہ

اللہ کرے ہم نگران وزیراعظم کا فیصلہ بھی کریں۔ خورشید شاہ

اسلام آباد(ملت آن لائن)اپوزیشن لیڈر خورشید شاہ نے کہا ہےکہ چیرمین نیب کے معاملے پر کوئی مک مکا نہیں ہوا اور اس پر اپوزیشن کا بھی کوئی گلہ نظر نہیں آیا۔

اپنے چیمبر میں صحافیوں سے گفتگو کرتے ہوئے خورشید شاہ نے کہا کہ جسٹس (ر) جاوید اقبال کا بیک گراؤنڈ بہت بہتر ہے،ایمانداری سے کہتا ہوں کہ یہ ایسا نام تھا جو سب کو قابل قبول ہوتا جب کہ نئے چیرمین نیب کے نام پراپوزیشن کی جانب سے کوئی گلہ شکوہ نظرنہیں آیا اور ابھی تک کسی نے تنقید بھی نہیں کی۔

خورشید شاہ نے کہا کہ چیرمین نیب کے معاملے پر تحریک انصاف اورایم کیو ایم کے نام بھی ڈسکس ہوئے، اس پر کوئی مک مکا نہیں ہوا۔

اپوزیشن لیڈر کا کہنا تھا کہ جاوید اقبال کو کوئی ڈکٹیشن نہیں دے سکے گا لہٰذا ہمیں چاہیے کہ چیئرمین نیب کو متنازع نہ بنائیں۔

صحافی کی جانب سے خورشید شاہ سے سوال کیا گیا کہ کیا آپ چیرمین نیب کی طرح نگراں وزیراعظم کا بھی فیصلہ کریں گے جس پر انہوں نے کہا کہ اللہ کرے وہ وقت آجائے کہ ہم نگران وزیراعظم کا فیصلہ بھی کریں۔

خورشید شاہ نے کہا کہ اگرملک کی بہتری چاہتے ہیں توہمیں بہتر فیصلے کرنا ہوں گے، جب تک پارلیمنٹ ہے تب تک ہر سازش کا مقابلہ کریں گے۔

ایک سوال کے جواب میں ان کا کہنا تھا کہ نوازشریف کہہ دیں کہ ان کے بیٹے ہیں لیکن پاکستانی شہری نہیں۔