خبرنامہ

الیکشن کمیشن: امیدواروں کی تصاویر ویب سائٹ پر آویزاں کرنیکا فیصلہ
اسلام آباد: ( ملت آن لائن) الیکشن کمیشن نے آئندہ عام انتخابات میں حصہ لینے والے تمام امیدواروں کی تصاویر ویب سائٹ پر آویزاں کرنے کا فیصلہ کیا ہے۔ الیکشن کمیشن کے انتہائی باوثوق ذرائع نے روزنامہ دنیا کو بتایا کہ انتخابات میں شفافیت اور عوامی سہولت کے پیش نظر امیدواروں کی تصاویرپ اکستان کی انتخابی تاریخ میں پہلی بارویب سائٹ پر آویزاں کی جائیں گی۔ الیکشن کمیشن کی جانب سے قبل ازیں سکروٹنی کے دوران مختلف اداروں کے نادہندگان کی تفصیل سمیت دہر ی شہریت کے حامل افراد کی تفصیل ویب سائٹ پر رکھی گئی ہے۔

اسی طرح امیدواروں کی جانب سے کاغذات نامزدگی سمیت جمع کر دہ حلف نامے بھی آویزاں کر دیئے گئے ہیں جس سے عوام کو اپنے حلقوں کے امیدواروں سے متعلق بیشتر معلومات دستیاب ہوگی۔ واضح رہے کہ انتخابا ت میں مجموعی طور پر 12 ہزار 500 سے زائد امیدوار انتخابات میں حصہ لے رہے ہیں۔ دوسری طرف ملک بھر سے 5 فیصد ریٹرننگ افسران اور ڈسٹرکٹ الیکشن کمشنر کی جانب سے انتخابی نتائج کی بروقت ترسیل کیلئے ٹیکنالوجی کے استعمال پر عدم تعاون کی وجہ سے نتائج رات 2 بجے کی بجائے تاخیر سے موصول ہونے کاخدشہ ہے، حالانکہ قانونی تقاضا ہے کہ ریٹرننگ افسران آر ایم ایس کے ذریعے نتائج رات 2 بجے تک الیکشن کمیشن کو بھیجنے کے پابند ہیں۔

دوسری طرف الیکشن کمیشن نے 25 جولائی کونتائج کی بروقت ترسیل کے حوالے سے تیاریاں مکمل کر لی ہیں جس کیلئے 16 اور 21 جولائی کو تجربات بھی کئے گئے ہیں چیف الیکشن کمشنر اور سیکرٹری نے نتائج کی ترسیل کیلئے ٹیکنالوجی کے استعمال پر اطمینان کا اظہار کیا گیا۔ پولنگ کے دن نتائج کی ترسیل کے حوالے سے پریذائیڈنگ افسران رزلٹ ٹرانسمیشن کے ذریعے فارم 45 ریٹرننگ افسران اور الیکشن کمیشن کو بھجوائیں گے جس کے بعد کمپیوٹرز اسی ڈیٹا کے ذریعے از خود فارم 47، 48 اور 49 مرتب کریگا، ذرائع کا کہنا ہے کہ 25 جولائی کو رات 2 بجے تک 90 فیصد نتائج الیکشن کمیشن کو موصول ہونے کے امکانات ہیں۔

ادھر 108 حلقوں سے متعلق عدالتوں پر فیصلے الیکشن کمیشن کو موصول ہونے پرعام انتخابات ملتوی ہونے کاخطرہ ٹل گیا ہے، ترجمان الیکشن کمیشن ندیم قاسم کا کہنا ہے کہ چھاپہ خانوں نے تمام حلقوں کے بیلٹ پیپرز کی چھپائی اور ترسیل کا عمل مکمل کر لیا ہے ، الیکشن کمیشن کے ذرائع کے مطابق کہ 108 حلقوں کے کیس عدالتوں میں چلنے کی وجہ سے ان حلقوں کی چھپائی معطل تھی۔ ان میں سے پنجاب کی 22، سندھ 81، بلوچستان کی 5 نشستوں پر انتخابات تاخیر کا شکار ہونے کا خدشہ ظاہر کیا جا رہا تھا۔

یہ بھی پڑھیے

سپریم کورٹ کے ہوتے جمہوریت پر کوئی آنچ نہیں آئے گی، چیف جسٹس
لاہور: (ملت آن لائن) چیف جسٹس میاں ثاقب نثار نے کہا ہے کہ عدلیہ کو بدنام کرنے کی کوشش کی جا رہی ہے، سپریم کورٹ کے ہوتے جمہوریت پر کوئی آنچ نہیں آئے گی۔

چیف جسٹس ثاقب نثار کا لاہور میں تقریب سے خطاب کرتے ہوئے کہنا تھا کہ عدلیہ اپنا بھرپور کردار ادا کر رہی ہے لیکن ہمارے ادارے کو بدنام کرنے کی کوشش کی جا رہی ہے۔ سپریم کورٹ کے ہوتے جمہوریت پر کوئی آنچ نہیں آئے گی۔ طاقتور عدلیہ کے ہوتے ہوئے کسی سے ناانصافی نہیں ہو سکتی۔ خدانخواستہ عدلیہ کا ادارہ کمزور پڑ گیا تو یہ المناک حادثہ ہو گا۔

یہ بھی پڑھیں:
جسٹس شوکت عزیز صدیقی کے ساتھ بھی انصاف ہو گا، چیف جسٹس

چیف جسٹس کا کہنا تھا کہ میں نے زندگی میں کبھی جھوٹ نہیں بولا اور ناانصافی نہیں کی بلکہ عملی طور پر لوگوں کو انصاف دینے کی کوشش کی۔
میں نے اپنی قوم سے بروقت الیکشن کا وعدہ پورا کیا، بروقت الیکشن عدلیہ کی طاقت کی وجہ سے ہو رہے ہیں۔ متعدد بار کہا کہ جمہوریت پر آنچ نہیں آئے گی، آئین اور جمہوریت ہمیشہ قائم رہے گی۔

تقریب سے خطاب میں چیف جسٹس نے کہا کہ اللہ کرے کہ ملک کا نیا سربراہ عمر ثانی کے نقش قدم پر چلے۔ اللہ تعالیٰ ملک کو بہترین لیڈر دے، وہ چاہے کسی بھی پارٹی سے ہو کیونکہ جب اچھا لیڈر بھاگ دوڑ سنبھالے گا تو ہمیں مشکلات سے چھٹکارا دلائے گا۔ جب اچھا لیڈر ملے گا تو ہمیں جوڈیشل ایکٹوزم کی ضرورت نہیں پڑے گی۔