خبرنامہ

امریکا سے جنگ فرض: شمالی کوریا
پیانگ یانگ:(ملت آن لائن) غیرملکی خبررساں ادارے کے مطابق شمالی کوریا کی وزارت خارجہ کی جانب سے جاری بیان میں کہا گیا ہے کہ امریکا اور جنوبی کوریا کی بڑے پیمانے پر مشترکہ فوجی مشقوں اور جنگ کی دھمکیوں نے کوریائی خطے میں جنگ کو یقینی بنا دیا ہے ۔ امریکا نے ایسا کرکے ایک طرح سے جنگ کا اعلان کردیا ہے ۔شمالی کوریا کے وزیرخارجہ ری یونگ ہو نے سرکاری ٹی وی کو انٹرویو دیتے ہوئے کہا ہے کہ امریکی حکام جزیرہ نما کوریا کو جنگ میں دھکیلنے کے لیے محاذ آرائی پر مبنی بیانات دے رہے ہیں، ہم جنگ نہیں چاہتے لیکن جنگ سے بھاگنے والے بھی نہیں ہیں ۔ ری یونگ ہو نے کہا کہ اگر واشنگٹن نے ہمارے صبر کو کمزوری سمجھ کر جوہری جنگ شروع کی تو شمالی کوریا اسے بھاری قیمت چکانے پر مجبور کر دے گا ۔ شمالی کوریا کی وزارت خارجہ نے کہا کہ صرف یہ سوال باقی رہ گیا ہے کہ جنگ کب چھڑتی ہے ۔