آشیانہ اسکیم: احد چیمہ اور شاہد شفیق کے جسمانی ریمانڈ سے متعلق فیصلہ محفوظ
لاہور:(ملت آن لائن) احتساب عدالت نے آشیانہ ہاؤسنگ اسکیم اسکینڈل میں گرفتار ایل ڈی اے کے سابق ڈائریکٹر جنرل احد چیمہ اور شاہد شفیق کے جسمانی ریمانڈ سے متعلق فیصلہ محفوظ کرلیا۔
نیب نے آشیانہ اقبال ہاؤسنگ اسکیم اسکینڈل میں گرفتار ملزمان کو جسمانی ریمانڈ ختم ہونے پر سخت سیکیورٹی میں احتساب عدالت کے روبرو پیش کیا۔
اس موقع پر نیب کے وکیل نے کہا کہ احد چیمہ اور ان کے خاندان نے 32 کنال زمین اپنے نام کرائی جب کہ ان پر آشیانہ ہاؤسنگ اسکیم میں اختیارات کے ناجائز استعمال کا الزام ہے۔
نیب کی جانب سے گرفتار احد چیمہ اور شاہد شفیق کے جسمانی ریمانڈ میں توسیع کی استدعا کی گئی جس پر عدالت نے فیصلہ محفوظ کرلیا۔
نیب ذرائع کے مطابق احد چیمہ پر غیر قانونی طور پر ایک فرم کا 14 ارب روپے کا ٹھیکہ دینے کا الزام ہے جب کہ ملزم شاہد شفیق پر جعلی دستاویزات پر 14 ارب کا ٹھیکہ لینے کا الزام ہے۔
ذرائع کا کہنا ہے کہ آشیانہ اقبال ہاؤسنگ اسکیم کے 90 فیصد شیئرز بسمہ انجینرنگ کے پاس تھے۔