خبرنامہ

اپوزیشن لیڈر کا وزیراعظم، چیف جسٹس ملاقات کی تفصیل جاری کرنے کا مطالبہ

اسلام آباد:(ملت آن لائن) قومی اسمبلی میں اپوزیشن لیڈر اور پیپلز پارٹی کے رہنما سید خورشید شاہ نے وزیراعظم اور چیف جسٹس کے درمیان ملاقات کی تفصیل جاری کرنے کا مطالبہ کردیا۔ خورشید شاہ کا کہنا تھا کہ، ‘یہ ہو ہی نہیں ہوسکتا کہ دو گھنٹے جاری رہنے والی ملاقات میں صرف کچرا، پانی اور گیس کے مسائل پر بات ہوئی ہو۔’ دوسری جانب خورشید شاہ نے وزیراعظم سے چیف جسٹس کے ساتھ ہوئی ملاقات کی تفصیل جاری کرنے کا مطالبہ بھی کردیا۔ واضح رہے کہ منگل 27 مارچ کو وزیراعظم شاہد خاقان عباسی اور چیف جسٹس آف پاکستان جسٹس ثاقب نثار کے درمیان ہونے والی تقریباً 2 گھنٹے طویل ون آن ون ملاقات نے سب کو حیران کردیا تھا۔
وزیراعظم نے چیف جسٹس سے ملاقات میں نوازشریف کو بچانے کیلئے ہاتھ باندھے ہوں گے: عمران
ملاقات کے بعد ترجمان سپریم کورٹ کی جانب سے جاری کیے گئے اعلامیے میں بتایا گیا کہ ملاقات وزیراعظم کی درخواست پر ہوئی جس کی درخواست اٹارنی جنرل کے ذریعے کی گئی۔ ترجمان کے مطابق وزیراعظم نے پاکستان میں عدالتی نظام کی بہتری کے لیے مکمل معاونت کی یقین دہانی کرائی اور چیف جسٹس سے کہا کہ حکومت سستے اور فوری انصاف کے لیے وسائل فراہم کرے گی۔
وزیراعظم اور چیف جسٹس کی ملاقات کا وقت مناسب نہیں، خورشید شاہ
اسی دن جیو نیوز کے پروگرام ‘کیپٹل ٹاک’ میں گفتگو کرتے ہوئے خورشید شاہ نے کہا تھا کہ وزیراعظم شاہد خاقان عباسی اور چیف جسٹس پاکستان میاں ثاقب نثار کے درمیان ملاقات کا وقت مناسب نہیں۔ خورشید شاہ نے مزید کہا تھا کہ اس وقت حکومت کے خلاف بہت سے کیسز چل رہے ہیں، چیف جسٹس اور وزیراعظم کی ملاقات کوئی غیر معمولی بات نہیں، ہمارے دور میں بھی ایسی ملاقاتیں ہوتی رہی ہیں تاہم ملاقات کا یہ وقت مناسب نہیں بلکہ اس سے شکوک و شبہات میں اضافہ ہوگا۔