خبرنامہ

بلوچستان کی ترقی کیلیے وفاقی حکومت کا مزید وسائل کی فراہمی پر اتفاق

اسلام آباد(ملت آن لائن)وفاقی حکومت نے صوبہ بلوچستان کی ترقی کے لیے مزید وسائل کی فراہمی پر اتفاق کرلیا ہے۔

وزیر اعظم شاہد خاقان کی زیر صدارت قومی سلامتی کمیٹی کا اجلاس ہوا جس میں وفاقی وزراء کے ساتھ چیرمین جوائنٹ چیفس آف اسٹاف، آرمی چیف قمر جاوید باجوہ اور پاک بحریہ اور فضائیہ کےسربراہان بھی شریک ہوئے۔

اجلاس کے دوران کمیٹی نے باجوڑ ایجنسی میں پاک فوج کی چیک پوسٹ اور کوئٹہ میں پولیس حکام پر بھی حملوں کی مذمت کی جبکہ دشمن خفیہ اداروں کی پاکستان کوغیر مستحکم کرنے کی سرگرمیوں پر اظہار تشویش کیا گیا۔

اجلاس کے دوران سیکرٹری خارجہ نے کمیٹی کو خطے کی سلامتی کی صورتحال پر تفصیلی بریفنگ دی۔

قومی سلامتی کمیٹی نے بلوچستان کی صورتحال پر بھی غور کیا اور صوبے میں افواج اور قانون نافذ کرنے والے اداروں کی کوششوں سے بہتری پر اظہار اطمینان کیا گیا جبکہ ترقیاتی منصوبوں پر شفافیت کیلیے عمل درآمد یقینی بنانے کا طریقہ کار بنانے پر اتفاق کیا گیا۔

کمیٹی نے اتفاق کیا کہ بلوچستان کی ترقی کےلیے بھرپور تعاون جاری رکھا جائے گا جبکہ وفاقی حکومت بلوچستان میں بہترین افسروں کی تعیناتی پر عمل پیرا ہے۔

اجلاس کے دوران بلوچستان میں شرپسندوں کی آمدورفت روکنے کیلیے سرحدی انتظامات پر بھی بریفنگ دی گئی۔

کمیٹی نے اتفاق کیا کہ پاکستان مختلف ملکوں سے دو طرفہ وعدوں کی پاسداری کرے گا۔

سیکرٹری خارجہ نے کمٹی کو مشرق وسطی میں تیزی سے رونما ہوتے واقعات پر بھی بریفنگ دی۔