تحریک انصاف کا اسحاق ڈار سے فوری استعفے کا مطالبہ
اسلام آباد(ملت آن لائن)تحریک انصاف کے رہنما شاہ محمود قریشی نے وزیر خزانہ اسحاق ڈار سے فوری مستعفی ہونے کا مطالبہ کردیا۔
اسلام آباد کی احتساب عدالت نے وزیر خزانہ اسحاق کے خلاف آمدن سے زائد اثاثوں پر نیب ریفرنس پر فرد جرم عائد کردی ہے تاہم اسحاق ڈار نے صحت جرم سے انکار کردیا۔
تحریک انصاف کے رہنما شاہ محمود قریشی نے فرد جرم عائد ہونے کے بعد وزیر خزانہ سے فوری مستعفی ہونے کا مطالبہ کردیا ہے۔
شاہ محمود قریشی کا کہنا تھا کہ اسحاق ڈار پارٹی اور ملکی معیشت کے مفاد میں استعفیٰ دیں کیونکہ وہ کیس پر دھیان دیں گے یا قلمدان پر۔
دوسری جانب عوامی مسلم لیگ کے سربراہ شیخ رشید کا کہنا تھا کہ بعض لوگوں کوعزت نہیں دولت عزیز ہوتی ہے، ان لوگوں نےملک میں جمہوریت کا ستیاناس کردیا ہے۔
شیخ رشید کا کہنا تھا کہ حدیبیہ کیس کا سات،آٹھ دن میں فیصلہ آنا ہے اور سب سے گہرے پانی میں اسحاق ڈار ہیں۔