خبرنامہ

تحریک انصاف کا صادق سنجرانی کی بطور چیئرمین سینیٹ نامزدگی کا فیصلہ

اسلام آباد:(ملت آن لائن) تحریک انصاف اور بلوچستان کے آزاد سینیٹرز نے صادق سنجرانی کو بطور چیئرمین سینیٹ امیدوار نامزد کرنے کا فیصلہ کرلیا۔ وزیراعلیٰ بلوچستان عبدالقدس بزنجو کی قیادت میں بلوچستان کے آزاد سینیٹرز کا وفد بنی گالہ پہنچا جہاں انہوں نے چیئرمین تحریک انصاف عمران خان سے ملاقات کی۔ اس موقع پر چیئرمین سینیٹ کے لئے پی ٹی آئی اور بلوچستان کے آزاد سینیٹرز کے متفقہ امیدوار صادق سنجرانی اور انوار الحق کاکڑ بھی موجود تھے۔ ترجمان تحریک انصاف کے مطابق ملاقات کے دوران صادق سنجرانی کی متفقہ طور پر چیئرمین سینیٹ نامزدگی کا فیصلہ کیا گیا ہے۔
چیئرمین سینیٹ کون؟ سیاسی جماعتوں کے رابطے اور جوڑ توڑ عروج پر پہنچ گیا
وزیراعلیٰ بلوچستان عبدالقدوس بزنجو کا کہنا تھا کہ عمران خان کے فیصلے سے وفاق اور پاکستان مضبوط ہوگا، پیپلز پارٹی ڈپٹی چیئرمین سینیٹ کے لئے اپنا امیدوار نامزد کرے ہم حمایت کریں گے۔ وزیراعلیٰ بلوچستان عبدالقدوس بزنجو نے پیپلز پارٹی اور دیگر جماعتوں سے رابطوں کے حوالے سے عمران خان کو آگاہ کیا۔ عمران خان کا کہنا تھا کہ بلوچستان اور فاٹا کو اہم عہدے دینے سے احساس محرومی کم ہوگا، چیئرمین سینیٹ کے عہدے پر بلوچستان کا حق بنتا ہے اور ہم چاہتے ہیں ڈپٹی چیئرمین سینیٹ فاٹا سے ہو۔ اس موقع پر وزیراعلیٰ بلوچستان عبدالقدوس بزنجو کا کہنا تھا کہ تحریک انصاف نے بلوچستان کا حق تسلیم کر کے اچھی روایت قائم کی اور حمایت کرنے پر عمران خان کے مشکور ہیں۔
چیئرمین سینیٹ کیلئے (ن) لیگ کے امیدوار کے نام کا اعلان آج متوقع
دوسری جانب مسلم لیگ (ن) کی جانب سے بھی چیئرمین سینیٹ کے نام کے اعلان کے لئے آج اسلام آباد میں مشاورتی بیٹھک ہوگی جس میں نواز شریف چیئرمین سینیٹ کے لئے اپنے امیدوار کے نام کا اعلان کریں گے۔ مسلم لیگ (ن) اور اتحادی جماعتوں کی مشاورت سے چیئرمین سینیٹ کے لئے پیپلز پارٹی کے نومنتخب سینیٹر رضا ربانی کا نام سامنے آیا ہے تاہم پیپلز پارٹی نے اگر انہیں نامزد نہ کیا تو (ن) لیگ اپنے نام کا اعلان کرے گی۔