خبرنامہ

حکومت ملک کے سب سے بڑے کرپٹ شخص کو بچانے میں لگی ہے، عمران خان

اسلام آباد:(ملت آن لائن) چیئرمین تحریک انصاف عمران خان کا کہنا ہے کہ حکومت ملک کے سب سے بڑے کرپٹ شخص کو بچانے میں لگی ہوئی ہے اور عدلیہ پر این آر او کے لئے دباؤ ڈالا جا رہا ہے۔ ایس ایس پی تشدد کیس میں پیشی کے بعد میڈیا سے بات کرتے ہوئے عمران خان کا کہنا تھا کہ نواز شریف کو کرپشن میں سزا ہونے کا تمام کرپٹ عناصر کو ڈر ہے جب کہ وزیراعظم شاہد خاقان عباسی کٹھ پتلی ہیں اور عدلیہ پر این آر او کے لئے دباؤ ڈالا جارہا ہے۔ عمران خان نے کہا کہ پیسا ملک سے باہر لے کر گئے ہیں اور ڈراما کیا جارہا ہے کہ مجھے کیوں نکالا، کوئی شک نہیں کہ یہ سارا کرپشن مافیا ہے، پہلے نہ کبھی ان کی چوری اور نہ جرم پکڑے گئے تاہم اب فرد جرم سے بچنے کے لیے کروڑوں روپے خرچ کرکے جلسے کرائے جارہے ہیں۔ ان کا کہنا تھا کہ لودھراں کے ضمنی انتخاب میں پیسے خرچ کیے گئے اور لوگوں کو قیمے والے نان کھلا کر جلسے کرائے جا رہے ہیں۔
ایس ایس پی تشدد کیس: عمران خان کی حاضری سے استثنیٰ اور بریت کی درخواست دائر
میڈیا سے بات چیت کے دوران ہیلی کاپٹر گزرنے پر عمران خان نے دلچسپ تبصرہ کرتے ہوئے کہا کہ اس ہیلی کاپٹر میں میاں صاحب تو نہیں گزر رہے جس پر وہاں زور دار قہقہے گونج اٹھے۔ چیئرمین تحریک انصاف نے کہا کہ ملک کا نام عالمی دہشت گردی کی واچ لسٹ میں ڈالا جا رہا ہے اور حکومت ایک کرپٹ کو بچانے میں لگی ہے، ملکی خارجہ پالیسی کی کمزوری کی وجہ سے آج یہ صورتحال ہے، کبھی سنا ہے کہ کسی ملک کا وزیرخارجہ کسی اور ملک سے 16 لاکھ روپے تنخواہ لے رہا ہو۔ عمران خان نے کہا کہ تحریک انصاف کے امیدوار علی ترین نے لودھراں کے ضمنی انتخاب میں سخت مقابلہ کیا اور حکومتی امیدوار کے خلاف 91 ہزار ووٹ لئے۔