خبرنامہ

حکومت کیخلاف کسی بھی وقت سڑکوں پر نکلنے کا اعلان کرسکتے ہیں، طاہرالقادری

لاہور(ملت آن لائن)پاکستان عوامی تحریک کے سربراہ ڈاکٹر طاہرالقادری کا کہنا ہے کہ حکومت کے خلاف کسی بھی وقت سڑکوں پر نکلنے کا اعلان کر سکتے ہیں۔

عوامی مسلم لیگ کے سربراہ شیخ رشید سے ملاقات کے بعد اپنی رہائش گاہ پر میڈیا سے بات کرتے ہوئے ڈاکٹر طاہرالقادری نے کہا کہ جسٹس باقر نجفی کی رپورٹ نے چھپا سچ واضح کردیا ہے اور رپورٹ میں نواز شریف اور شہباز شریف کو ملزم ٹھہرایا ہے۔

ڈاکٹر طاہرالقادری نے مطالبہ کیا کہ سانحہ ماڈل ٹاؤن کی تحقیقات کے لئے پاناما لیکس کے طرز کی جے آئی ٹی بنائی جائے۔

اس موقع پر شیخ رشید نے کہا کہ سپر پاور کو خوش کرنے کے لئے ناموس رسالت قانون میں تبدیلی کی کوشش کی گئی اور آج نواز شریف خود باہر ہوگئے ہیں، دنیا کی کوئی طاقت انہیں انجام تک پہنچنے سے نہیں روک سکتی۔

شیخ رشید کا کہنا تھا کہ شکر ہے چوہدری نثار کو بھی بولنے کا موقع ملا، ان سب کی زبانیں شیخ رشید کے خلاف بول رہی ہیں، شیخ رشید حق کے ساتھ کھڑا ہے۔
پیپلز پارٹی کے علاوہ پی ٹی آئی کے سربراہ اپنے جلسوں میں تقاریر کے دوران شہباز شریف حکومت کے خلاف احتجاج کے لئے پی اے ٹی کا ساتھ دینے کی پیش کش کر چکے ہیں۔

پاکستان مسلم لیگ ق کے رہنما چوہدری شجاعت حسین اور پرویز الہٰی نے بھی ڈاکٹر قادری سے رابطہ کیا ہے جنہوں نے ہفتے کے روز پاک سرزمین پارٹی کے رہنما مصطفیٰ کما ل سے ملاقات کی اور شہباز شریف اور رانا ثناء اللہ کو ہٹانے کا مطالبہ کیا۔

انتخابی سیاست میں پی اے ٹی کبھی اثرات مرتب نہیں کر سکی، لیکن اس کی اسٹریٹ کی طاقت اور مخلص کارکنوں کی وجہ سے اپوزیشن کی جماعتیں اسے قائل کرنے کی کوشش کر رہی ہیں کہ وہ شہباز شریف حکومت سے جان چھڑانے کے لئے فیصلہ کن احتجاج شروع کرے۔