خبرنامہ

ریٹرننگ آفیسر نے کلثوم نواز کی جیت کا غیر سرکاری اعلان کردیا
لاہور(ملت آن لائن)ریٹرننگ آفیسر نے لاہور کے حلقہ این اے 120 کے غیر سرکاری غیر حتمی نتائج کا اعلان کرتے ہوئے مسلم لیگ ن کی کلثوم نواز کو کامیاب امیدوارقرار دیا ہے۔انھوں نے 61 ہزار 745 ووٹ حاصل کیے۔

این اے 120 کے غیر سرکاری غیر حتمی نتائج کے مطابق تحریک انصاف کی امیدوار یاسمین راشد نے 47 ہزار 99 ووٹ حاصل کیے۔

پیپلز پارٹی کے فیصل میر نے ایک ہزار 414، ملی مسلم لیگ کے حمایت یافتہ آزاد امیدوار محمد یعقوب شیخ نے 5 ہزار 822 ووٹ حاصل کیے۔

جماعت اسلامی کے ضیاء الدین انصاری نے 592 جبکہ آزاد امیدوار شیخ اظہر حسین نے 7 ہزار 130 ووٹ حاصل کیے۔

ریٹرننگ آفیسر کے مطابق این اے 120 میں ووٹنگ کا تناسب 39 اعشاریہ 42 فیصد رہا۔ ایک ہزار 731 ووٹ مسترد کر دیے گئے۔ حتمی نتائج کا اعلان 19 ستمبر کو کیا جائے گا۔

واضح رہے کہ کلثوم نواز کی جیت کی خبرملتے ہی لاہور میں بھرپور جشن کا آغاز ہوگیا، کارکنوں نے پارٹی ترانوں پر رقص کیا، بھنگڑے ڈالے ، ایک دوسرے کو مٹھائیں کھلائیں اور آتش بازی کا مظاہرہ بھی کیا گیا۔

این اے 120 ضمنی انتخاب میں پاکستان تحریک انصاف کی امیدوار یاسمین راشد نے الیکشن کمیشن کے خلاف عدالت جانے کا اعلان کیا ہے۔

لاہور میں صحافیوں سے گفتگو کرتے ہوئے یاسمین راشد نے کہا کہ فی الحال کسی چیز پر تبصرہ نہیں کرنا چاہتی، الیکشن کا دن پرسکون رہنے پر فوج اور میڈیا کا شکریہ ادار کرتی ہوں، فوج کی وجہ سے لوگ پرسکون رہے اور آرام سے ووٹ ڈالا۔ ان کا کہنا تھا کہ آج کے نتائج پر 29 ہزار ووٹوں کا سایہ پڑا ہوا ہے،اس معاملے کو ایسے نہیں چھوڑیں گے بلکہ آخری دم تک اس کا پیچھا کریں گے اور الیکشن کمیشن کے خلاف عدالت ضرور جاؤں گی۔

یاسمین راشد نے کہا کہ پچھلی بار پولنگ اسٹیشنز میں (ن) لیگ کے لوگ گھس جاتے تھے اس بار ایسا نہیں ہوا۔ انہوں نے کہا کہ ہماری خواہش ہے الیکشن ہمیشہ صاف اور شفاف ہوں کیونکہ غلط طریقے سے جیتا گیا الیکشن جمہوریت کو مضبوط کرنے کے بجائے کمزور کرتا ہے۔
Advertisement