قوم آج 70واں یوم آزادی ملی جوش و جذبے کے ساتھ منا رہی ہے ، ملک بھر میں جشن آزادی کی مناسبت سے تقاریب کا انعقاد بھی کیا جارہا ہے، ہر گلی، محلے اور سڑک پر سبز ہلالی پرچموں اور جھنڈیوں کی بہار ہے۔
آج دن کا آغاز وفاقی دارالحکومت میں 31 اور صوبائی دارالحکومتوں میں 21-21 توپوں کی سلامی سے ہوا، نماز فجر کے بعد ملک کی ترقی، سلامتی یکجہتی، امت مسلمہ کے اتحاد اور کشمیریوں کی دیرینہ جدوجہد میں کامیابی کیلئے خصوصی دعائیں مانگی گئیں۔
پرچم کشائی کی مرکزی تقریب کا انعقاد پارلیمنٹ ہاؤس کی بجائے کنونشن سینٹر اسلام آباد میں کیا گیا جس میں صدر مملکت ممنون حسین اور وزیراعظم شاہد خاقان عباسی نے پرچم کشائی کی رسم ادا کی۔
تقریب میں چیئرمین سینیٹ، اسپیکر قومی اسمبلی، وفاقی وزرا، مسلح افواج کے سربراہان، اراکین پارلیمان، سفارتی نمائندے اورسینئر حکام نے بھی شرکت کی۔
چین کے نائب وزیراعظم وانگ یانگ نے بھی یوم آزادی کی مرکزی تقریب میں شرکت کی۔
یوم آزادی کے موقع پر شاہراہ دستور پر واقع ایوان صدر، پارلیمنٹ ہاؤس، سپریم کورٹ، وزیراعظم آفس، پاک سیکرٹریٹ اور دیگر عمارتوں کو نہایت خوبصورتی سے سجایا گیا ہے، وزیراعظم کی ہدایت پر ڈی چوک کو بھی کھول دیاگیا ہے۔
قبل ازیں پرچم کشائی کی تقریب 17 سال بعد پارلیمنٹ ہاؤس کے احاطے میں منعقد کرنے کی چیئرمین سینیٹ کی تجویز سے وزیراعظم نے اتفاق کیا تھا اس سلسلے میں انتظامات بھی کرلئے گئے تھے لیکن خراب موسم کی وجہ سے یہ تقریب حسب سابق کنونشن سینٹر میں منعقد کرنے کا فیصلہ کیاگیا۔
جشن آزادی کے موقع پر پاک فضائیہ کے ساتھ ساتھ برادر اسلامی ملک سعودی عرب اور ترک فضائیہ کے جدید جنگی طیارے بھی وفاقی دارالحکومت میں ہونے والے ایئرشو میں حصہ لیں گے۔
تینوں فضائیہ کے طیارے فضا میں بل کھاتے اور مختلف فارمیشنز بنا کر رنگوں کی صورت کرتب دکھا کر شہریوں کو محفوظ کریں گے، ایئر شو آج دوپہر کو ایف نائن پارک میں ہوگا۔
راولپنڈی میں پرچم کشائی کی سرکاری تقریب آج کمشنر ہائوس، ڈپٹی کمشنر ہائوس، لاہور ہائی کورٹ راولپنڈی بینچ،میونسپل کارپوریشن راولپنڈی سمیت دیگر مقامات پر ہوئی