خبرنامہ

شہبازشریف، حمزہ اور مریم نواز کے درمیان 6 ماہ بعد ملاقات

لاہور(ملت آن لائن)شہبازشریف، حمزہ شہباز اور مریم نواز کے درمیان 6 ماہ بعد اہم ملاقات ہوئی ہے۔

ذرائع کے مطابق وزیراعلیٰ پنجاب اور مریم نواز کے چچا شہبازشریف کے درمیان 6 ماہ بعد انتہائی اہم ملاقات ہوئی ہے جس میں شہبازشریف کے صاحبزادے حمزہ شہباز بھی موجود تھے۔

ذرائع نے بتایا کہ ملاقات کے دوران نوازشریف کی ملک میں عدم موجودگی کے باعث سیاسی امور چلانے پر بات چیت کی گئی جب کہ اس موقع پر شہبازشریف نے مریم نواز کو مشورہ دیا کہ محاذ آرائی کی سیاست سے کوئی فائدہ نہیں ہوگا، اس لیے اداروں کے خلاف کوئی بھی بیان بازی نہ کی جائے اس سے نقصان ہوگا۔

ذرائع کے مطابق اس اہم ملاقات میں حمزہ شہباز کو بھی شریک کرکے مریم اور حمزہ کے درمیان سرد جنگ ختم کرانے کی کوشش کی جار ہی ہے۔

واضح رہے کہ این اے 120کے ضمنی انتخاب کی مہم حمزہ شہباز نے چلانی تھی تاہم اچانک حمزہ شہباز بیرون ملک روانہ ہوگئے تھے جس کے بعد مہم میاں نوازشریف کی صاحبزادی مریم نواز نے چلائی تھی۔