خبرنامہ

عمران خان کا نیا مطالبہ سامنے آگیا

اسلام آباد:(ملت آن لائن) پاکستان تحریک انصاف (پی ٹی آئی) کے چیئرمین عمران خان نے الیکشن کمیشن سے حلقہ بندیوں کا عمل 90 روز میں مکمل کرنے کا مطالبہ کر دیا۔ سماجی رابطے کی ویب سائٹ ٹوئٹر پر جاری بیان میں عمران خان کا کہنا تھا کہ سیاسی خلاء کے باعث ملک میں گورننس کا نظام تتر بتر ہے اور آئینی ترمیم کی منظوری کے بعد الیکشن کمیشن حلقہ بندیوں کا عمل جلد از جلد مکمل کرنے کا پابند ہے، لہذا الیکشن کمیشن کو پورا عمل 90 روز (3 ماہ) میں مکمل کرنا چاہیے۔ عمران خان کا مزید کہنا تھا کہ تحریک انصاف مختلف حیلے بہانوں سے انتخابی عمل میں تاخیر بالکل گوارا نہیں کرے گی۔ رواں ماہ 19 دسمبر کو پاکستان تحریک انصاف کی مکمل حمایت کے ساتھ سینیٹ نے 24ویں آئینی ترمیم منظور کی تھی، جس کے تحت الیکشن کمیشن آف پاکستان کو پابند کیا گیا ہے کہ 2018ء کے الیکشن قومی اسمبلی کی نشستوں کی نئی تقسیم کے مطابق کرائے جائیں جس کے لیے 2017ء کی مردم شماری کے عبوری نتائج کے مطابق نئی حلقہ بندیوں کا کام ابھی ہونا ہے۔ حلقہ بندیوں سے متعلق آئینی ترمیمی بل سینیٹ سے منظور آئینی ترمیم کی وجہ سے صوبوں کے درمیان قومی اسمبلی کی نشستوں کے حصے کی ری ایلوکیشن مردم شماری 2017ء کے نتائج کے مطابق ہو چکی ہے۔ اب نئی مردم شماری کے مطابق اور قومی اسمبلی کی نشستوں کی ری ایلوکیشن کے تحت، الیکشن کمیشن کو حلقہ بندیوں کا کام کرنا ہے جس کے بعد آئندہ انتخابات ہوں گے۔ 24ویں آئینی ترمیم کی منظوری سے جلد الیکشن کے راستے بند الیکشن کمیشن آف پاکستان کو توقع ہے کہ حلقہ بندیوں کا کام اپریل 2018ء تک مکمل کر لیا جائے گا تاکہ آئندہ عام انتخابات کے بروقت انعقاد کو یقینی بنایا جا سکے۔ اگرچہ الیکشن کمیشن آف پاکستان چاہتا تھا کہ یہ آئینی ترمیم 10 نومبر تک ہو جانی چاہیے تھی تاکہ 2018ء کے عام انتخابات میں کسی بھی طرح کی تاخیر سے بچا جا سکے لیکن حکومت اور اپوزیشن کے درمیان کشیدگی کی وجہ سے یہ معاملہ تاخیر کا شکار ہوگیا تھا تاہم اب آئینی ترمیم کی منظوری سے یہ کام 19 دسمبر کو مکمل ہوا۔