مسئلہ ٹیسوری نہیں، عامرخان پارٹی پرقبضہ کرنا چاہتے ہیں، فاروق ستارگروپ
کراچی:(ملت آن لائن) سینیٹ الیکشن کے ٹکٹ کے معاملے پر شروع ہونے والا ایم کیو ایم پاکستان کا تنظیمی بحران بدستور برقرار ہے اور ایم کیو ایم رابطہ کمیٹی نے فاروق ستار سے مذاکرات کے لیے ایک اور وفد ان کی رہائش گاہ پر بھیجا ہے۔ ایم کیو ایم رابطہ کمیٹی کا تین رکنی وفد فاروق ستار سے مذاکرات کے لیے پی آئی بی میں ان کی رہائش گاہ پہنچ گیا ہے، رابطہ کمیٹی کے وفد میں رؤف صدیقی، ریحان ہاشمی اور جاوید حنیف شامل ہیں۔ ایم کیو ایم پاکستان کے بہادرآباد مرکز پر میڈیا نمائندوں سے بات کرتے ہوئے فیصل سبزواری کا کہنا تھا کہ ایم کیو ایم کو قائم رکھنے کے لیے اصولوں پر چلنا ہو گا، تنظیم کو بحران سے نکالنے کی ذمہ داری رابطہ کمیٹی کی ہے۔ فیصل سبزواری کا کہنا تھا کہ ہم نے ہمت ہاری نہیں اور ہم تقسیم کے خلاف ہیں، کل سے فاروق ستار کا انتظار کر رہے ہیں۔
ایم کیو ایم رابطہ کمیٹی نے سینیٹ کے ٹکٹ دینے کا اختیار خالد مقبول صدیقی کو دیدیا
انہوں نے کہا کہ جو جتنا ذمہ دار ہے اس پر اتنی بڑی زمہ داری ہے، یہاں کوئی کسی کو توڑ نہیں رہا، ہمیں توڑنے والوں کے ساتھ نہیں جوڑنے والوں کے ساتھ کھڑے ہونا ہے۔ ان کا کہنا تھا کہ سینیٹ انتخابات کوئی اتنی بڑی چیزنہیں ہے لیکن چاہتے ہیں کبھی بھی تقسیم کا پہلو سامنے نہ آئے۔ فیصل سبزواری نے کہا کہ تنظیم میں پیسے کی بنیاد پر کسی کا اثر و رسوخ نہیں چلے گا، تنظیم میں اقراباء پروری کو فروغ نہیں دینا چاہیے اور نا ہی پسند ناپسند کو فروغ دینا چاہیے۔ دوسری جانب ذرائع کا کہنا ہے کہ فاروق ستار نے کل ایم کیو ایم کا جنرل ورکرز اجلاس طلب کر لیا ہے۔ جنرل ورکرز اجلاس کل دوپہر 3 بجے پی آئی بی کے ایم سی گراؤنڈ میں ہو گا جس میں فاروق ستار کارکنان سے رائے لیں گے اور اہم فیصلے کریں گے۔
ایم کیو ایم پاکستان رابطہ کمیٹی کا الیکشن کمیشن کو خط
آج صبح ایم کیو ایم پاکستان کی رابطہ کمیٹی نے الیکشن کمیشن کو ایک خط لکھا جس میں کہا گیا کہ پارٹی آئین کے تحت امیدواروں کو ٹکٹ دینے کا اختیار کسی فرد واحد کو نہیں بلکہ رابطہ کمیٹی کو حاصل ہے۔ خط میں مزید کہا گیا ہے کہ رابطہ کمیٹی نے اپنے آپ کو یہ اختیار دے دیا ہے کہ جو نام رابطہ کمیٹی منتخب کرے گی وہی سینیٹ کے امیدوار ہوں گے۔
کامران ٹیسوری کی ’معطلی‘، ایم کیو ایم پاکستان دو حصوں میں تقسیم ہوگئی
خط کے متن کے مطابق پارٹی آئین کی شق 19 اے کے تحت الیکشن کے لیے امیدواروں کو ٹکٹ رابطہ کمیٹی دے گی اور ہر طرح کے انتخابات کے لیے امیدواروں کو ٹکٹ دینےکا اختیار صرف رابطہ کمیٹی کو ہے۔ رابطہ کمیٹی کے مطابق رابطہ کمیٹی نے امیدواروں کے لیے خط لکھنے کا اختیار خالد مقبول صدیقی کو دیا جو امیدواروں سے متعلق الیکشن کمیشن کو خط لکھنے کے مجاز ہیں۔ خیال رہے کہ کامران ٹیسوری کو سینیٹ الیکشن کا ٹکٹ دینے کے معاملے پر ایم کیو ایم پاکستان دو حصوں میں تقسیم ہو گئی تھی۔ فاروق ستار کامران ٹیسوری کو سینیٹ الیکشن کا ٹکٹ دینے کے اپنے فیصلے پر تاحال قائم ہیں اور انہوں نے الیکشن کمیشن کو کامران ٹیسوری کا نام بھی جمع کرا دیا ہے جب کہ ایم کیو ایم رابطہ کمیٹی کامران ٹیسوری کو سینیٹ الیکشن کا ٹکٹ دینے کی مخالف ہے۔