خبرنامہ

معصوموں کا خون رنگ لایا ہے: وزیراعظم
اسلام آباد (ملت آن لائن) وزیراعظم شاہد خاقان عباسی نے کہا ہے کہ 16 دسمبر2014ء کا دن ملکی تاریخ میں یوم سیاہ کے طور پر یاد رکھا جائے گا جب بربریت اور سفاکیت کے علمبرداوں کی جانب سے آرمی پبلک سکول پشاور میں معصوم بچوں کو نشانہ بنایا گیا۔انھوں نے کہا کہ حصولِ تعلیم کے لیے جانے والے معصوم جب واپس لوٹے تو اْن میں سے بہت ساروں نے شہادت کی قبا اوڑھ رکھی تھی اور اْن کی ایک بڑی تعداد زخموں سے چور اور ذہنوں میں بزدل دشمن کی سفاکیت کے نقوش لیے ہوئے تھی۔ان کا کہنا تھا کہ دہشت گردی کے خلاف جنگ میں پاکستانی قوم نے جان ومال کی جو قربانیاں پیش کی ہیں وہ شاید ہی کسی دوسری قوم نے دی ہوں۔ان خیالات کا اظہار وزیراعظم نے سانحہ آرمی پبلک سکول کی یاد کے موقع پر اپنے پیغام میں کیا۔وزیر اعظم نے کہا کہ سانحہ آرمی پبلک سکول نے پاکستانی قوم میں دہشت گردی کے خلاف تاریخ ساز وحدت کو جنم دیا۔ اس دل سوز اور دل خراش واقعے کے نتیجے میں پوری قوم نے کامل یکسوئی کے ساتھ دہشت گردی کے عفریت کے خلاف فیصلہ کن معرکہ لڑنے کا مصمم ارادہ کرلیا۔نیشنل ایکشن پلان کے تحت ہماری بہادر افواج اور سیکورٹی اداروں نے دہشت گردوں کو شکستِ فاش دی۔ اِن کی دِن رات محنت اور قربانیوں کی بدولت آج پاکستان میں دہشت گردوں کی کمر ٹوٹ چکی ہے۔ ان کا کہنا تھا کہ معصوموں کا خون رنگ لایا ہے اور آج پاکستانی قوم اقوامِ عالم میں وہ واحد قوم نے جس نے دہشت گردی کے خلاف جنگ جیت چکی ہے۔شاہد خاقان عباسی نے کہا کہ سانحہ اے پی ایس کے نتیجے میں ہم سے بچھڑ جانے والوں کی یاد ایک کسک بن کر ہمارے دلوں میں ہمیشہ موجود رہے گی۔ آج کا دن ہمیں یاد دلاتا رہے گا کہ وطنِ عزیز کو دہشت گردی سے پاک کرنے کے لیے ہم نے اپنے کیسے کیسے ہیرے قربان کیے۔ یہ دن ان معصوموں کو خراجِ عقیدت پیش کرنے اور اْن کے غم زدہ والدین کے ساتھ اظہارِ ہمدردی کا دن ہے۔ قوم ان معصوموں کی لازوال قربانی کو ہمیشہ یاد رکھے گی۔وزیر اعظم نے کہا کہ آج کا دن دہشت گردی کے خلاف قومی عزم کے اعادے کا دن بھی ہے۔ یہ دن ہمیں متوجہ کرتا رہے گا کہ ہم اپنی صفوں پر نگاہ رکھیں اور خبر دار رہیں کہ کوئی پاکستان میں انتہا پسندی کے بیج نہ بو سکے۔ان کا کہنا تھا کہ انتہا پسندی ہی وہ درخت ہے جس پر دہشت گردی کا زہریلا پھل لگتا ہے۔وزیر اعظم نے کہا کہ پاکستانی قوم اپنے معصوم شہیدوں ، افواجِ پاکستان ، پولیس اور دیگر سیکورٹی اداروں کے شہداء کو خراجِ عقیدت پیش کرتی ہے اور اِس عزم کا اعادہ کرتی ہے کہ شہدا ء کے خون سے لکھے جانے والے اِس باب کو منطقی انجام تک پہنچایا جائے گا۔انھوں نے کہا کہ آئیں آج یہ عہد کریں کہ ہم سب مل کر پاکستان کو ایک ایسا جمہوری معاشرہ بنائیں گے جہاں مذہب ، فرقہ واریت ، لسانیت ، رنگ ونسل یا کسی بھی عنوان سے تشدد اور انتہا پسندی کو برداشت نہیں کیا جائے گا۔