خبرنامہ

مکروہ کھیل میں نامی گرامی سیاستدان شامل ہیں، نواز شریف

اسلام آباد:(ملت آن لائن) سابق وزیراعظم نواز شریف کا کہنا ہے کہ الیکشن کے التوا کی کوئی گنجائش نہیں جب کہ مکروہ کھیل میں نامی گرامی سیاستدان شامل ہیں۔ احتساب عدالت میں صحافیوں سے غیر رسمی گفتگو کرتے ہوئے نواز شریف نے کہا کہ سیاستدان کا کوئی اصول اور مؤقف ہونا چاہیے، مشکوک کاموں کا وزیراعظم کو نوٹس لینا چاہیے جب کہ انہوں نے اس بارے میں اشارہ بھی دیا ہے۔ نواز شریف نے کہا کہ عمران خان نے آصف زرداری کو بیماری قرار دیا اور کہا تھا کہ ہاتھ نہیں ملاؤں گا اب وہ بتائیں کیا ان کے لوگوں نے ڈپٹی چیئرمین سینیٹ کے لئے تیر کے نشان پر مہر نہیں لگائی۔
سابق وزیراعظم کا کہنا تھا کہ اندر کی کہانی نہیں جانتا لیکن آصف زرداری جو کام کررہے ہیں وہ شرمناک ہے اور اس مکروہ کھیل میں نامی گرامی سیاستدان شامل ہیں۔ نواز شریف نے کہا کہ آئین میں الیکشن کے التوا کی گنجائش نہیں اور کوئی نظریہ ضرورت قبول نہیں کیا جائے گا۔ ان کا کہنا تھا کہ جنہوں نے ووٹ خریدے وہ کیا جواب دیں گے کیونکہ وہ خریدے ہوئے لوگ ہیں۔ ملک میں حالیہ لوڈشیڈنگ سے متعلق سوال پر نواز شریف نے کہا کہ لوڈشیڈنگ کا دورانیہ بڑھنے کی وجوہات جاننے کے لئے حکومت سے بات کروں گا، پچھلے پانچ برسوں کے دوران ہزاروں میگاواٹ بجلی سسٹم میں آئی، جب تک میں وزیراعظم تھا لوڈ شیڈنگ نہیں ہو رہی تھی۔ نواز شریف نے کہا کہ کسی کمپنی کے واجبات ادا کرنے ہیں یا کوئی اور وجہ ہے، اس حوالے سے وزیراعظم سے معلوم کروں گا۔ سابق وزیراعظم کا کہنا تھا کہ چیف جسٹس ملاقات پر وزیراعظم شاہد خاقان عباسی سے بات نہیں ہوئی اور اگر ہوئی تو آگاہ کروں گا۔