خبرنامہ

نوازشریف ختم نبوت سے متعلق شق نکالنے سے آگاہ تھے، نعیم الحق
اسلام آباد:(ملت آن لائن) تحریک انصاف کے رہنما نعیم الحق کا کہنا ہے کہ جب ختم نبوت والی شق نکالی گئی اس سے نوازشریف مکمل آگاہ تھے۔ سپریم کورٹ کے باہر میڈیا سے گفتگو کرتے ہوئے نعیم الحق نے کہا کہ حکومت کام کرنے کے قابل نہیں رہی ہے، وزرا فرائض سے غفلت برت رہے ہیں، جاتی امرا اور پنجاب ہاؤس کا چکر لگارہے ہیں، اس وقت وزرا کی ساری توجہ معزول وزیراعظم نواز شریف کو خوش کرنے میں ہے جسے قوم دیکھ رہی ہے۔ انہوں نے کہا کہ (ن) لیگ میں دراڑیں پیدا ہو چکی ہیں اور انتشار موجود ہے، اس کے چند ایم این ایز اور ایم پی ایز نے استعفیٰ دیدیا ہے۔ نعیم الحق کا کہنا تھا کہ جس معاہدے کے تحت دھرنا ختم ہوا اگر اس میں آرمی چیف اثر انداز نہیں ہوتے تو حکومت خود ہمت ہار بیٹھی تھی، حکومت نے دھرنا ختم کرانے کے لیے کوئی بامعنی کوشش نہیں کی، وزرا 21 دن تک سوچ بولنے سے گریز کررہے ہیں۔
پی ٹی آئی رہنما نے مزید کہا کہ جب ختم نبوت والی شق نکالی گئی اس سے نوازشریف مکمل آگاہ تھے جب کہ اس پر راجا ظفرالحق کی رپورٹ تیار ہے تو 30 دن کا وقت کیوں؟ نعیم الحق نے (ن) لیگ کی حکومت کے فوری مستعفی ہونے کا مطالبہ کرتے ہوئے کہا کہ وزیرخزانہ مفرور، وزیرخارجہ مجبور اور وزیرداخلہ معذورہے، (ن) لیگی حکومت عوامی حمایت کھو چکی ہے اس لیے فوری طور پر نئے انتخابات کرائے جائیں۔