خبرنامہ

نوازشریف کی احتساب عدالت میں پیشی کے لیے وطن واپسی

اسلام آباد:(ملت آن لائن) سابق وزیر اعظم نواز شریف احتساب عدالت میں پیشی کے لیے لندن سے وطن واپس پہنچ گئے ہیں۔ سابق وزیر اعظم نواز شریف لندن سے پی آئی اے کی پرواز پی کے 786 کے ذریعے اسلام آباد پہنچے۔ ان کے استقبال کے لیے خواجہ سعد رفیق، مشاہداللہ خان ، پرویز رشید ، آصف کرمانی، چوہدری تنویر، راجہ ظفر الحق، محسن رانجھا، امیر مقام اور دیگر مسلم لیگی رہنما ایئرپورٹ پر موجود تھے، نواز شریف کو پہلے راول لاؤنج لایا گیا، جہاں پہلے سے موجود تفتیشی آفیسر محبوب عالم کی سربراہی میں نیب کی ٹیم نے سابق وزیراعظم سے احتساب عدالت کے سمن کی تعمیل کروائی۔
تعمیلی سمن پر دستخط کے بعد نواز شریف نے ان کے استقبال کے لیے موجود مسلم لیگ (ن) کے رہنماؤں سے مختصر مشاورت کی اور پھر پنجاب ہاؤس اسلام آباد روانہ ہوگئے۔ اس موقع پر سیکیورٹی کے انتہائی سخت انتظامات کئے گئے تھے۔
پاکستان روانگی سے قبل لندن میں میڈیا سے بات کرتے ہوئے نوازشریف نے کہا تھا کہ پاکستان کے نظام میں تضادات ہیں اور یہی ہماری بد قسمتی ہے، وہ پہلے بھی عدالتوں کو بھگت چکے ہیں اوراب بھی نہیں بھاگیں گے جب کہ 3 نومبر کوعدالت میں پیش ہونے کے لیے پاکستان جارہا ہوں، میں کیوں ہر10 سال بعد ملک چھوڑوں، آخرمیں نے کیا کیا ہے۔ ایک سیکنڈ میں وزیراعظم کو ہائی جیکربنا دیتے ہیں، یہ کہاں کا دستور ہے، مجھ پرہائی جیکنگ کا کیس بناکر سزا دی گئی مگر کس قانون کے تحت یہ سزا دی گئی۔ انہوں نے کہا کہ موجودہ کیسز بھی اسی طرح کے ہی کیسزہیں۔

واضح رہے کہ جمعے کو اسلام آباد کی احتساب عدالت میں نواز شریف، مریم نواز اور کیپٹن (ر) صفدرکے خلاف نیب ریفرنسز کی سماعت ہوگی، عدالت نے گزشتہ دو سماعتوں میں عدم پیشی پر نواز شریف کے قابل ضمانت وارنٹ گرفتاری جاری کئے تھے۔