خبرنامہ

اسلام آباد ہائی کورٹ۔نوازشریف کے خلاف تینوں ریفرنسز پر فیصلہ محفوظ

اسلام آباد:(ملت آن لائن) سابق وزیراعظم نوازشریف کے خلاف 3 ریفرنسز کا جوائنٹ ٹرائل کرنے کی درخواست پر فیصلہ محفوظ کرلیا گیا۔ اسلام آباد ہائی کورٹ کے جسٹس عامرفاروق اورجسٹس محسن کیانی پرمشتمل ڈویژن بنچ نے سابق وزیراعظم نواز شریف کے خلاف تینوں ریفرنسز کا مشترکہ ٹرائل کرنے پرفیصلہ محفوظ کرلیا۔
وکیل نوازشریف کی جانب سے کہا گیا کہ احتساب عدالت میں کل سماعت ہے، کارروائی روکی جائے، چارج شیٹ کی کاپیاں فراہم کر دی گئی ہیں جب کہ ایک ہی الزام پر3 ریفرنس دائر نہیں کیے جا سکتے، جس پر نیب پراسیکیوٹر کی جانب سے کہا گیا کہ سپریم کورٹ کے حکم پر تین ریفرنسز دائر کیے گئے۔ عدالت کی جانب سے ریمارکس دیئے گئے کہ ہم درخواست پر آج ہی فیصلہ سنائیں گے۔
اس سے قبل نواز شریف کے وکیل کی جانب سے درخواست میں مزید کہا گیا تھا کہ نیب قانون کے تحت اثاثے جتنے بھی ہوں، جرم ایک تصور ہوتا ہے جس کے باعث نیب کو 3 ریفرنسز کو ایک ریفرنس میں بدلنے کا حکم دیا جائے۔اسلام آباد کی احتساب عدالت میں نواز شریف کے خلاف نیب ریفرنسز کی سماعت ہوگی، عدالت نے گزشتہ دو سماعتوں میں عدم پیشی پر نواز شریف کے قابل ضمانت وارنٹ گرفتاری جاری کئے تھے۔

نیب نے سابق وزیراعظم نوازشریف کے خلاف احتساب عدالت سے جاری کردہ سمن کی تعمیل کرادی،نوازشریف نے احتساب عدالت پیش ہونے کی نیب ٹیم کو یقین دہائی کرا دی،وفاقی وزیر کیڈ طارق فضل چوہدری نے 10لاکھ روپے کے ضمانتی مچلکے جمع کرا دیے اورنقول نیب ٹیم کو فراہم کر دیں،نیب ٹیم نے نوازشریف سے ان کے وکلا کی موجودگی میں ملاقات کی۔جمعرات کو نیب کی ٹیم پنجاب ہاؤس پہنچی،پانچ رکنی نیب ٹیم کی سربراہی ڈپٹی ڈائریکٹر محبوب احمد نے کی،نیب ٹیم نے نوازشریف سے ملاقات کی ،جس موقع پر نوازشریف کے وکلا بھی موجودتھے،ٹیم نے احتساب عدالت کے تین سمن پر دستخط کروائے،وفاقی وزیر کیڈ طارق فضل چوہدری نے10لاکھ روپے کے ضمانتی مچلکوں کی نقول نیب ٹیم کو فراہم کیں۔احتساب عدالت میں پیشی کی یقین دہانی کرانے پر نیب کی ٹیم واپس روانہ ہوگئی۔