نگراں وفاقی کابینہ کے بدھ کو ہونے والے اجلاس میں العزیزیہ اور فلیگ شپ ریفرنسوں کی جیل میں سماعت سے متعلق نوٹی فکیشن واپس لینے یا نہ لینے کا فیصلہ بدھ کے روز آج کابینہ اجلاس میں ہوگا۔
نگراں وفاقی کابینہ کا اہم اجلاس وزیراعظم ناصرالملک کی زیر صدارت آج ہو گا ، اجلاس میں فاٹا اصلاحات پر اہم فیصلہ کیا جائے گا۔ العزیزیہ اور فلیگ شپ ریفرنسوں کی جیل میں سماعت سے متعلق نوٹی فکیشن واپس لینے کی منظوری بھی ایجنڈے میں شامل ہے۔
نگراں وزیراعظم نے وفاقی کابینہ کا اجلاس آج دن گیارہ بجے طلب کیا ہے جس کے لیے نو نکاتی ایجنڈا تیار کرلیا گیا ہے ، اجلاس میں امن و امان کی صورت حال پر غور ہوگا اور انتخابی عمل کو شفاف بنانے کے اقدامات کو حتمی شکل دی جائے گی۔
کابینہ کو ملک میں امن و امان کی صورت حال اور دہشت گردی کے حالیہ واقعات پر بریفنگ دی جائے گی، کابینہ سپریم کورٹ کے دیامر بھاشا اور مہمند ڈیم فنڈ کے لیے سرکاری ملازمین کی تنخواہوں میں کٹوتی کی منظوری دے گی، فاٹا اور پاٹا کو وفاقی ٹیکسوں سے مستثنیٰ قرار دینے کی منظوری بھی دی جائے گی۔
اجلاس میں انتخابی عمل شفاف بنانے کے اقدامات کو بھی حتمی شکل دی جائے گی، جب کہ منی لانڈرنگ کیخلاف اقدامات اور ایف اے ٹی ایف کی شرائط پرغور، بینکنگ کورٹ لاہور کے جج کی تعیناتی اور چیئرمین پورٹ قاسم کو اضافی ذمہ داریاں دینے کی منظوری بھی بدھ کے روز ہونے والے اجلاس میں متوقع ہے۔