خبرنامہ

نیب کا اسحاق ڈار کیخلاف حدیبیہ کیس میں دوبارہ تحقیقات شروع کرنیکا اعلان
اسلام آباد:(ملت آن لائن) نیب کے اعلامیے کے مطابق، سپریم کورٹ کے فیصلے کی روشنی میں اسحاق ڈار کے خلاف تحقیقات کا آغاز کیا جا رہا ہے۔ نیب کا کہنا ہے کہ یاد رہے کہ اسحاق ڈار ماضی میں اس کیس میں وعدہ معاف گواہ بن گئے تھے۔ لہٰذا اب عدالت عظمیٰ کے فیصلے کی روشنی میں قانونی تقاضے پورے کئے جا رہے ہیں۔ اسحاق ڈار نے حدیبیہ پیپر ملز ریفرنس میں 25 اپریل 2000ء کو مجسٹریٹ کے سامنے اپنے اعترافی بیان میں منی لانڈرنگ کرنے کا انکشاف کیا تھا۔

اسلام آباد:
وزیر خزانہ اسحاق ڈار نے کہا ہے کہ حدیبیہ پیپرز ملز کیس کی دوبارہ تحقیقات سے متعلق نیب کااعلان غیر منطقی اور سمجھ سے بالا تر ہے۔

نیب کی جانب سے حدیبیہ پیپرز ملز کیس کی دوبارہ تحقیقات پرردعمل دیتے ہوئے وزیر خزانہ اسحاق ڈار نے کہا کہ لاہور ہائی کورٹ نے اس معاملے کو ختم کرکے میرے حق میں فیصلہ دیا تھا جب کہ سپریم کورٹ نے اس مقدمہ کی ازسر نو تفتیش کیلئے تاحال کوئی احکامات جاری نہیں کئے اس کے باوجود نیب کا دوبارہ تحقیقات کااعلان ناقابل فہم اور قانون کے خلاف ہے۔

واضح رہے کہ نیب نے حدیبیہ پیپرز ملز میں وزیرخزانہ اسحاق ڈار کو بطور ملزم نامزد کرکے تحقیقات کا اعلان کرتے ہوئے کہا ہے کہ دوبارہ تحقیقات کا آغاز سپریم کورٹ کے حکم کی روشنی میں کیا جارہا ہے، اسحاق ڈار اس کیس میں وعدہ معاف گواہ بنے تھے۔