خبرنامہ

وزیراعظم کے مشیر مفتاح اسماعیل نے وفاقی وزیر خزانہ کے عہدے کا حلف اٹھالیا

اسلام آباد:(ملت آن لائن) وزیراعظم کے مشیر مفتاح اسماعیل نے وفاقی وزیر خزانہ کے عہدے کا حلف اٹھالیا۔ حکومت کی جانب سے مفتاح اسماعیل کو وزیر خزانہ، ریونیو اور اکنامک افیئر لگائے جانے کا نوٹی فکیشن جاری کردیا گیا ہے۔ جس کے بعد ان کی بحیثیت وفاقی وزیر حلف برداری کی تقریب ایوان صدر میں منعقد ہوئی جس کے دوران صدر مملکت ممنون حسین نے مفتاح اسماعیل سے وفاقی وزیر کے عہدے کا حلف لیا۔ حلف برداری کی تقریب میں کابینہ کے ارکان سمیت اعلیٰ حکام اور سیاسی کارکنوں نے شرکت کی۔
مفتاح اسماعیل کے بطور وزیر خزانہ تقرر کا معاملہ
مفتاح اسماعیل نہ تو قومی اسمبلی کے ممبر ہیں اور نہ ہی سینیٹ کے، اس لئے انہیں آئین کے آرٹیکل 91 کی ذیلی دفعہ 9 کے تحت وفاقی وزیر بنایا گیا ہے۔ آئین کے آرٹیکل 91 کی ذیلی دفعہ 9 کہتی ہے کہ کسی بھی ایسے شخص کو 6 ماہ کے لیے وفاقی وزیر بنایا جا سکتا ہے جو قومی اسمبلی کا رکن نا ہو تاہم 6 ماہ کے بعد اس کا وفاقی وزیر کا عہدہ ختم ہو جائے گا۔ ایسا شخص 6 ماہ بعد اسمبلی کی تحلیل تک اس کا رکن منتخب ہوئے بغیر دوبارہ وزیر نہیں بن سکتا۔ یاد رہے کہ اسحاق ڈار کی طویل رخصت اور پھر ان سے وزیر خزانہ کی ذمہ داریاں لیے جانے کے بعد سے وزیر خزانہ کا قلمدان وزیراعظم کے پاس تھا۔