خبرنامہ

پاکستانی ٹیکسی ڈرائیور کا جمائما کو ہراساں کرنے کا اعتراف

لندن(ملت آن لائن)عمران خان کی سابقہ اہلیہ جمائما کو ہراساں کرنے والے کرنے والے 27 سالہ پاکستانی ٹیکسی ڈرائیور نے اپنے جرم کا اعتراف کرلیا۔

برطانوی میڈیا کے مطابق لندن میں پاکستانی ٹیکسی ڈرائیور حسن محمود مسلسل عمران خان کی سابق اہلیہ جمائما کو پریشان کر رہا تھا اور جب اس نے جمائما کے گھر آنے کے ارادہ ظاہر کیا تو انہوں نے پولیس کو تمام صورتحال سے آگاہ کیا جس پر پولیس کی جانب سے ٹیکسی ڈرائیور کو عدالت میں طلب کیا گیا۔

پولیس نے ڈرائیور کے خلاف مقدمہ درج کیا جس کی سماعت آئزل ورتھ کراون عدالت میں ہوئی اور ابتدائی بیان میں ملزم ڈرائیور حسن محمود نے اعتراف کرتے ہوئے کہا کہ جمائما اس کی ٹیکسی میں بیٹھیں جس کے بعد وہ ان کا گرویدہ ہوگیا۔

ڈرائیور کے مطابق دوران سفر اس نے جمائما کا نمبر بھی حاصل کر لیا تھا اور پھر اس نے جمائما کو 1182 بار ٹیلی فون کالز اور 203 میسجز کیے لیکن کوئی جواب نہیں ملا۔

ٹیکسی ڈرائیور کا کہنا تھا کہ وہ عمران خان کا بہت بڑا مداح ہے اور جمائما سے محبت کرتا ہے۔

کیس کی سماعت کے بعد عدالت کے جج نے مقدمے کی مزید سماعت 26 اکتوبر تک ملتوی کر دی۔