خبرنامہ

پاکستان درست سمت میں جارہا ہے، جنرل جوزف ووٹل

واشنگٹن:(ملت آن لائن) امریکی فوج کی سینٹرل کمانڈ کے سربراہ جنرل جوزف ووٹل نے کہا ہے کہ پاکستان اب درست سمت میں جارہا ہے اور بہت مثبت اشارے مل رہے ہیں۔ جنرل جوزف ووٹیل نے ایوان نمائندگان میں اپنے بیان میں کہا کہ پاکستان دہشت گردوں کے محفوظ ٹھکانوں سے متعلق امریکی تحفظات پر توجہ دے رہا ہے۔ انہوں نے کہا کہ پاکستان امریکا کی جنوبی ایشائی پالیسی کی کامیابی کیلئےاہم ہے۔ سربراہ امریکی سینٹ کام نے کہا کہ امریکا جنوبی ایشیا کی پالیسی پر عمل درآمد کررہا ہے، جس میں افغانستان میں طالبان کو مفاہمت کی طرف لانا شامل ہے۔ ان کے مطابق پالیسی میں افغانستان کے طویل مسئلے کوحل کرنا بھی شامل ہے، اس کو کامیاب بنانے کے لئے خطے کے تمام ممالک کی شراکت داری چاہیے۔ ان کا مزید کہنا تھا کہ پاکستان افغانستان کے مسائل کے حل کیلئے اہم ہے۔واضح رہے امریکی صدر نے پاکستان میں دہشت گردوں کی محفوظ پناہ گاہوں کی موجودگی کا الزام عائد کرتے ہوئے کہا تھا کہ پاکستان دہشت گردوں کی معاونت کررہا ہے جب کہ ٹرمپ انتظامیہ نے کولیشن سپورٹ فنڈ کی مد میں پاکستان کو دی جانے والی رقم بھی روک رکھی ہے۔