خبرنامہ

پی پی 30 کوٹ مومن ضمنی الیکشن، پولنگ کا وقت ختم، ووٹوں کی گنتی جاری
کوٹ مومن: (ملت آن لائن) کوٹ مومن کے حلقہ پی پی تیس میں ضمنی الیکشن کیلئے پولنگ کا وقت ختم ہو گیا ہے جس کے بعد ووٹوں کی گنتی کا عمل جاری ہے۔

کوٹ مومن کے حلقہ پی پی 30 کے ضمنی الیکشن میں پاکستان مسلم لیگ ن کے حمایت یافتہ یاسر ظفر سندھو اور پاکستان تحریک انصاف کے راؤ ساجد محمود کے درمیان سخت مقابلے کی توقع کی جا رہی ہے۔

خیال رہے کہ پاکستان مسلم لیگ ن کے رکن اسمبلی چودھری طاہر احمد سندھو کی وفات کے بعد اس نشست پر انتخابات ہو رہے ہیں۔ وہ 2013ء کے انتخابات میں پی پی 30 سے کامیاب ہوئے تھے۔

حلقہ پی پی 30 میں کل ووٹرز کی تعداد 1 لاکھ 73 ہزار 919 ہیں جن میں مرد ووٹرز کی تعداد 98 ہزار 145 جبکہ خواتین ووٹرز کی تعداد 75 ہزار 774 ہے۔ حلقے میں کل پولنگ سٹیشنز 137 ہیں جن میں مرد پولنگ سٹیشنز کی تعداد 31 جبکہ خواتین پولنگ سٹیشنز کی تعداد بھی 31 ہے۔

آج ہونے والے ضمنی الیکشن میں 4 امیدوار مدمقابل تھے جن میں پاکستان تحریک انصاف کے امیدوار راؤ ساجد محمود، مسلم لیگ ن کے حمایت یافتہ امیدوار یاسر ظفر سندھو جبکہ راؤ وقاص احمد اور عاصم اقبال نے آزاد امیدوار کی حیثیت سے انتخابات میں حصہ لیا۔

کوٹ مومن پی پی 30 ضمنی الیکشن کے 19 پولنگ سٹیشنز کے غیر حتمی اور غیر سرکاری نتائج کے مطابق مسلم لیگ ن کے حمایت یافتہ یاسر ظفر سندھو 4124 ووٹ لے کر آگے جبکہ تحریک انصاف کے امیدوار راؤ ساجد محمود 2814 ووٹ لے کر دوسرے نمبر پر ہیں۔