خبرنامہ

چیئرمین سینیٹ کیلئے (ن) لیگ سرگرم، فاٹا کا ایک آزاد سینٹیر پارٹی میں شامل

اسلام آباد:(ملت آن لائن) مسلم لیگ (ن) نے اپنا چیئرمین اور ڈپٹی چیئرمین سینیٹ لانے کے لیے کوششیں تیز کردیں جب کہ فاٹا کے ایک نومنتخب آزاد سینیٹر نے بھی (ن) لیگ میں شمولیت اختیار کرلی۔ سینیٹ انتخابات کے بعد اب پیپلزپارٹی کے ساتھ ساتھ چیئرمین اور ڈپٹی چیئرمین سینیٹ کے لیے مسلم لیگ (ن) کی بھی سرتوڑ کوششیں جاری ہے اس حوالے سے پارٹی قائد میاں نوازشریف کی سربراہی میں مشاورتی اجلاس بھی ہو رہا ہے۔ اسلام آباد میں چوہدری منیر کے گھر پر ہونے والے غیر رسمی مشاورتی اجلاس میں مریم اورنگزیب، مصدق ملک اور دیگر پارٹی رہنما شریک ہیں۔
(ن) لیگ اپنا چیئرمین سینیٹ لانے کی پوزیشن میں
اجلاس میں چیئرمین اور ڈپٹی چیئرمین سینیٹ کے انتخاب کے لیے مشاورت کی جارہی ہے جب کہ دونوں عہدوں کے لیے اپنے امیدواروں کے ناموں پر بھی غور کررہی ہے۔ اجلاس میں اپوزیشن اور اتحادی جماعتوں سے رابطے کرنے کا فیصلہ کیے جانے کا امکان ہے جب کہ اپوزیشن سے رابطوں کے لیے کمیٹی قائم کیے جانے کا بھی امکان ہے۔
فاٹا کے نومنتخب آزاد سینیٹر کی شمولیت
دوسری جانب فاٹا سے تعلق رکھنے والے نومنتخب آزاد سینیٹر مرزا محمد آفریدی نے نوازشریف سے ملاقات کی اور (ن) لیگ میں شمولیت کا اعلان کردیا۔