خبرنامہ

کالے ہرن کے شکار کیس میں سلمان خان کو 5 سال قید کی سزا

ممبئی:(ملت آن لائن) بھارتی ریاست جودھ پور کی مقامی عدالت نے کالے ہرن کے شکار کیس کا 20 سال بعد فیصلہ سناتے ہوئے بالی وڈ سپر اسٹار سلمان خان کو 5 سال قید کی سزا کا حکم سنا دیا جب کہ نامزد دیگر اداکاروں کو بری کردیا گیا۔ بھارتی میڈیا کے مطابق بھارتی ریاست جودھ پور کے چیف جوڈیشل مجسٹریٹ کی عدالت نے اداکار سلمان خان، سیف علی خان، اداکارہ تبو، نیلم اور سونالی باندرے کے خلاف کالے ہرن کے شکار سے متعلق کیس کا 28 مارچ کو محفوظ کردہ فیصلہ سنادیا۔ اس موقع پر تمام ملزمان کمرہ عدالت میں موجود تھے جب کہ جج نے اداکار سلمان خان کو نایاب 2 ہرنوں کے شکار کا مجرم قرار دیتے ہوئے 5 برس قید اور 10 ہزار روپے جرمانے کی سزا کا حکم دیا۔ عدالت نے اداکار سیف علی خان، اداکارہ تبو، نیلم اور سونالی باندرے کو عدم ثبوت پر بری کرنے کے احکامات جاری کیے۔ عدالتی فیصلے کے موقع پر سلمان خان کے مداحوں کی بڑی تعداد عدالت کے باہر موجود تھی جب کہ عدالتی فیصلہ سنائے جانے کے وقت سلمان خان کی بہنیں الویرا اور آرپیتا زار و قطار رونے لگیں۔ بھارتی میڈیا مطابق کے سلمان خان کو اب سے کچھ دیر بعد عدالت سے گرفتار کرنے کے بعد جیل منتقل کیا جائے گا جب کہ ان کے وکلا ضمانت کے لئے ہائی کورٹ یا سپریم کورٹ سے رجوع کیا جائے گا۔
سلمان خان نے بالی وڈ کے 600 کروڑ داؤ پر لگا دیئے
سلمان خان ان دنوں کئی میگا بجٹ فلموں اور شوز کی شوٹنگ میں مصروف تھے جن میں ریس 3، دبنگ 3 اور بھارت شامل ہیں تاہم اب خدشہ ظاہر کیا جارہا ہے کہ اداکار کو سزا ملنے کے بعد پروڈیوسرز کو بھاری نقصان کا سامنا کرنا پڑسکتا ہے۔
نایاب ہرنوں کے شکار کا پس منظر
اداکار سلمان خان سمیت نامزد دیگر اداکاروں پر الزام تھا کہ انہوں نے 1998 میں راجھستان کے گاؤں بشنوئی میں فلم ‘ہم ساتھ ساتھ ہیں’ کی شوٹنگ کے دوران 2 نایاب کالے ہرنوں کا شکار کیا تھا۔ مقامی گاؤں کے افراد نے ہرن کے شکار پر سلمان خان اور دیگر کے خلاف مقدمہ درج کرایا اور اپیل کی کہ ملزمان کو سخت سزا دی جائے۔ راجسھتان کے گاؤں بشنوئی کے لوگ کالے ہرن کی تعظیم کرتے ہیں اور انڈین وائلڈ لائف ایکٹ کے مطابق کالے ہرن کا شکار غیرقانونی ہے۔