خبرنامہ

کراچی (ملت + آئی این پی) آئی جی سندھ اے ڈی خواجہ نے سماء ٹی وی کی ڈی ایس این جی اور بکتر بند پر حملے کی تحقیقات کیلئے دو پولیس افسران کی سربراہی میں تفتیشی ٹیمیں بنا دی ہیں۔ واردات میں استعمال ہونیوالے اسلحے کی فرانزک رپورٹ بھی تیار کرلی گئی ۔کراچی کے علاقے نارتھ ناظم آباد میں سماء ٹی وی کی ڈی ایس این جی اور پولیس کی بکتر بند پر دہشتگردوں کے حملے کے بعد وزیراعلیٰ سندھ نے پولیس حکام کو ملزمان کی گرفتاری کی ہدایت کی تھی۔ ترجمان وزیراعلیٰ ہاؤس کے مطابق آئی جی سندھ نے واقعات کی تحقیقات کیلئے دو ٹیمیں تشکیل دے دی ہیں۔ ایک ٹیم کے سربراہ ایس اسی پی سینٹرل مقدس حیدر جبکہ دوسری ٹیم ایس ایس پی انویسٹی گیشن سینٹرل سمیع اللہ سومرو کی سربراہی میں کام کرے گی۔ٹیمیں روزانہ کی بنیاد پر تحقیقات کی پیش رفت سے آگاہ کریں گی۔دوسری جانب حملے میں استعمال ہونیوالے اسلحے کی فرانزک رپورٹ تیار کرلی گئی ۔ پولیس کے مطابق واردات میں دو مختلف نائن ایم ایم پستول استعمال کئے گئے جو پہلے کسی واردات میں استعمال نہیں ہوئے۔