خبرنامہ

کراچی میں 16 سالہ لڑکی کے قتل کا معمہ حل، بہن ہی قاتل نکلی

کراچی(ملت آن لائن)کراچی کے علاقے ملیر میں 16 سالہ لڑکی کے لرزہ خیز قتل کا معمہ حل ہوگیا اور تحقیقات کے بعد معلوم ہوا ہے کہ مقتولہ کی سگی بہن نے ہی اپنے دوستوں کے ساتھ مل کر بہن کو قتل کیا۔

ایس ایس پی کورنگی نعمان صدیقی نے پریس کانفرنس کرتے ہوئے ملیر کے علاقے سعودآباد میں 16 سالہ علینہ کے قتل سے متعلق تفصیلات سے آگاہ کیا جب کہ اس موقع پر ملزمہ علوینہ اور اس کا منگیتر مظہر بھی ہمراہ تھا۔

ملزمہ علوینہ نے میڈیا کے نمائندوں کو بتایا کہ احسن نامی شخص کی وجہ سے اس کے بہن سے اختلافات تھے اور کافی سمجھانے کے باوجود بہن نہ مانی تو اپنے منگیتر کی مدد سے اس کے گلے پر چھری پھیر کر اس کی زندگی کا خاتمہ کردیا۔

ملزمہ نے بتایا کہ احسن نامی شخص کے پاس اس کی نازیبا تصاویر اور ویڈیوز تھیں جس کی وجہ سے علینہ اور احسن اُسے بلیک میل کرتے تھے۔

علوینہ نے مزید بتایا کہ قتل کے روز ( 5 دسمبر) کو میرے منگیتر مظہر گھر آئے اور علینہ کو بہت سمجھایا کہ ویڈیوز اور تصاویر ڈیلیٹ کردیں لیکن اس نے ایسا نہ کیا جس کے بعد اسے قتل کردیا گیا۔

علوینہ نے کہا کہ انہوں نے ہی منگیتر کو کہا کہ گھر سے پیسے اور زیورات ساتھ لے جائیں تاکہ کسی کو شک نہ ہو اور پھر ایسا ہی کیا۔

خیال رہے کہ علوینہ نے خود کو معصوم ظاہر کرنے کے لئے اپنے سر اور بازو پر خود زخم لگائے اور اہلخانہ اور پولیس کو بتایا کہ ڈکیتی مزاحمت پر ملزمان نے علینہ کو قتل اور اسے بھی زخمی کردیا۔

لواحقین نے پولیس کو دیئے گئے بیان میں ہزاروں روپے مالیت کے سونے کے زیورات، نقدی اور موبائل فون جانے کا بھی ذکر کیا تھا۔

خیال رہے کہ مقتولہ کی سگی بہن علوینہ نے واقعے کے بعد میڈیا سے بات کرتے ہوئے کہا تھا کہ دو ڈاکو گھر میں داخل ہوئے اور انہوں نے چھریوں کے وار سے علوینہ کو قتل کیا جب کہ چھریوں کے وار سے اسے بھی زخمی کردیا تھا۔