نئی دلی (مانیٹرنگ ڈیسک) بھارتی وزیرِ خارجہ سشما سوراج نے پاکستان کو دھمکی دی ہے کہ اگر ہندوستانی جاسوس کلبھوشن یادو کو پھانسی دی گئی تو پاکستان کو اس کے نتائج بھگتنا ہوں گے۔
گزشتہ روز بھارتی جاسوس کلبھوشن یادو کو بلوچستان اور کراچی میں منظم دہشت گردی کی منصوبہ بندیوں کا اعتراف کرنے کے بعد فوجی عدالت نے پھانسی کی سزا سنائی تھی جس پر شدید ردِ عمل کا مظاہرہ کرتے ہوئے نئی دہلی میں تعینات پاکستانی سفیر عبدالباسط کو دفتر بھارتی وزارتِ خارجہ میں بلوا کر احتجاجی مراسلہ ان کے سپرد کیا گیا جبکہ بھارت میں قید بے گناہ پاکستانی شہریوں کی رہائی بھی مؤخر کردی ہے جو بدھ کے روز ہونا تھی۔
لوک سبھا میں تقریر کرتے ہوئے سشما سوراج کا کہنا تھا کہ کلبھوشن ’’بھارت ماتا کا بیٹا‘‘ ہے جس کے خلاف الزامات بے بنیاد ہیں۔ اس کے دفاع میں اچھا وکیل کھڑا کرنا بہت چھوٹی بات ہے اور اگر ضرورت پڑی تو وہ صدر تک سے بات کریں گی۔
انہوں نے پاکستان کو دھمکی دی کہ اگر کلبھوشن کو پھانسی ہوئی تو دونوں ممالک کے درمیان دو طرفہ تعلقات شدید متاثر ہوں گے اور ایسے کسی بھی پاکستانی اقدام کا جواب دینے کےلیے بھارتی حکومت ’’کسی بھی حد تک‘‘ جائے گی۔
لوک سبھا کے اجلاس میں دوسرے بھارتی رہنماؤں نے بھی پاکستان کے خلاف تقاریر کی اور مطالبہ کیا کہ کلبھوشن یادو کو دی جانے والی سزا پر مذمتی قرارداد منظور کی جائے۔
اسی دوران نئی دہلی میں پاکستانی سفارت خانے کے باہر احتجاجی مظاہرہ بھی جاری ہے۔