خبرنامہ

پنجاب کے مختلف شہروں میں دھند کا راج، ٹریفک حادثات میں 6 جاں بحق
لاہور: (ملت آن لائن) لاہور سمیت پنجاب کے مختلف شہروں میں دھند کا راج برقرار ہے۔ ٹریفک کے مختلف حادثات میں چھ افراد جاں بحق ہو گئے۔ دھند کے باعث ٹرینوں کا شیڈول بھی متاثر ہوا۔ بیرون ممالک سے آنے اور جانے والی پروازیں بری طرح متاثر ہوئیں۔ سب سے زیادہ سردی سکردو میں پڑی جہاں درجہ حرارت منفی 12سنٹی گریڈ ریکارڈ کیا گیا۔ کراچی میں درجہ حرارت 11 سینٹی گریڈ ریکارڈ کیا گیا۔

ملک کے بیشتر حصے دھند کی لپیٹ میں ہیں،ملگجی روشنیاں، ہر منظر دھندلا گیا۔ فضا میں خنکی، ٹھنڈی ہوائیں، ہر سو کہر کی چادر تنی ہوئی ہے۔ دھند کے باعث ٹریفک حادثات بھی ہوئے۔ پہلا حادثہ ڈیرہ غازی خان میں جام پور روڈٖ پر ہوا جہاں کار ٹریلر سے ٹکرا گئی جس کے نتیجے میں چار افراد جان کی بازی ہار گئے۔ دوسرا حادثہ جھنگ میں سرگودھا روڈ پکے والا کے قریب پیش آیا جہاں ٹرک نے موٹر سائیکل کو ٹکر ماردی۔ حادثے میں دو افراد جاں بحق اور ایک خاتون زخمی ہو گئی۔

دھند کے باعث ٹرینوں کا شیڈول بھی متاثر ہوا، بیرون ممالک سے آنے اور جانے والی پروازیں بری طرح متاثر ہوئیں۔ موسم کا حال بتانےوالوں کے مطابق آئندہ ہفتے بارش کا کوئی امکان نہیں۔

ملک میں سب سے زیادہ سردی سکردو میں پڑی جہاں درجہ حرارت منفی12، کالام ، استور منفی08، قلات منفی07، گلگت منفی 06، کوئٹہ، راولاکوٹ منفی 05، مالم جبہ، دیر، بگروٹ منفی 04، ہنزہ، چترال منفی 03، مری، پارہ چنار،سیدو شریف میں 01 جبکہ کراچی میں 11ڈگری سینٹی گریڈریکارڈ کیا گیا۔