شاہ محمود قریشی کا دورہ کابل، افغان صدر اور چیف ایگزیکٹو سے ملاقاتیں
دفتر خارجہ سے جاری اعلامیے کے مطابق ملاقاتوں میں وزیر خارجہ شاہ محمود نے کہا کہ حکومت پاکستان افغانستان کے ساتھ تجارت، باہمی رابطوں کی مضبوطی اور ترقی کے لیے ملکر کا م کرے گی۔ پاکستانی وزیر خارجہ نے انسداد دہشتگردی اور سیکیورٹی کے شعبوں میں دونوں ممالک کے درمیان تعاون پر بھی زور دیا۔
ملاقاتوں میں اس بات پر اتفاق کیا گیا کہ دونوں ممالک کراسنگ پوانٹس، کسٹم اور انفراسٹرکچر کو بہتر بنانے کے لیے اقدامات کریں گے۔ شاہ محمود قریشی نے وزیراعظم پاکستان کی جانب سے 40 ہزار ٹن گندم کے تحفے کا خط بھی افغان صدر کو پہنچایا۔
دونوں وزراء خارجہ کی ملاقات میں فیصلہ کیا گیا کہ جوائنٹ اکنامک کمیشن، جوائنٹ علماء کانفرنس، پاک افغان ٹرانزٹ ٹریڈ اتھارٹی، پاک افغان ایکشن پلان اور امن و یکجہتی ورکنگ گروپس کے اجلاس بلائے جائیں گے۔
افغان حکومت نے شاہ محمود قریشی کو یقین دہانی کرائی کہ جلال آباد میں پاکستانی کونسل خانہ کھولنے کے لیے جلد سیکیورٹی فراہم کر دی جائے گی۔