خبرنامہ انٹرنیشنل

نئی دلی17اکتوبر(ملت + اے پی پی) جموں و کشمیر ڈیموکریٹک فورم کے سربراہ پنڈت بھوشن بزاز نے بھارت پر زوردیا ہے کہ وہ مسئلہ کشمیر کو مذاکرات کے ذریعے حل کرنے کیلئے حریت قیادت کے ساتھ مذاکرات کرے ۔ کشمیرمیڈیاسروس کے مطابق بھوشن بزاز نے جے پور میں ’’مسئلہ کشمیرکے پر امن حل ‘‘کے موضوع پر ایک سیمینار اور مباحثے سے خطاب کرتے ہوئے کہا کہ جموں و کشمیر میں ہندو اور مسلمانوں کے درمیان مکمل ہم آہنگی ہے اور وہ ہر شعبے میں ایک دوسرے کا مکمل ساتھ د ے رہے ہیں۔ انہوں نے کہا کہ گزشتہ 26برسوں کے دوران ریاست کا ہر باشندہ کسی نہ کسی طور پر متاثر ہوا ہے لیکن اس کا کوئی بھی اثر ہندو مسلم برادری پر نہیں ہوا ہے۔ انہوں نے کہا کہ اس بات کے باوجود کہ پنڈت برادری ریاست میں اقلیت میں ہے لیکن انہیں کبھی بھی مسلم اکثریت سے کوئی خطرہ محسوس نہیں ہوا۔انڈین ڈیموکرٹیک فرنٹ کے زیر اہتمام منعقدہ سیمینار میں پروفیشنلز ، صحافیوں ، وکلاء ، ادیبوں اور تاجر تنظیموں کے نمائندوں کے علاوہ تمام شعبہ زندگی سے تعلق رکھنے والے لوگوں نے شرکت کی ۔