خبرنامہ انٹرنیشنل

ماسکو:(ملت+ اے پی پی) روس نے شامی بندرگاہ طرطوس میں موجود اپنے بحری اڈے پر ایئر ڈیفنس میزائل نظام ایس 300 بھیجنے کی تصدیق کر دی۔برطانوی نشریاتی ادارے کے مطابق پیر کے روز امریکہ نے شام میں شدت پسندوں کے خلاف روس کے ساتھ مل کر مربوط فضائی حملوں کے لیے کیے جانے والے مذاکرات کو معطل کرنے کا اعلان کیا تھا۔روس کی وزارت دفاع کے ترجمان ایگور کوناشینکوو کا کہنا ہے کہ اس میزائل سسٹم کو بھیجنے کا مقصد اپنے بحری اڈے کے تحفظ کو یقینی بنانا ہے۔یہ اقدام ایک ایسے وقت میں کیا گیا ہے جب مغرب کے ساتھ تناؤ میں اضافہ ہو رہا ہے۔میجر جنرل کوناشینکوو نے کہا ہے کہ ایس 300 مکمل طور پر دفاعی نظام ہے اور اس سے کسی کو کوئی خطرہ نہیں ہے۔ان کا مزید کہنا تھا کہ یہ واضح نہیں کہ ایس 300 کو بھیجنے پر ہمارے مغربی ساتھیوں کو اتنی تشویش کیوں ہو رہی ہے۔ ترجمان نے مزید کہا کہ یہ دفاعی نظام ویسا ہی ہے جیسا اس سے قبل ماسکو میں نصب کیا گیا تھا۔یہ پہلا موقع ہے کہ روس نے زمین سے فضا میں مار کرنے والے ایس 300 کو اپنی سرزمین سے باہر نصب کیا ہے۔