خبرنامہ انٹرنیشنل

حلب:(اے پی پی) شامی شہر حلب پر بیرل بم حملے میں پندرہ افراد جاں بحق ہوگئے، صدر بشارالاسد کی حامی فوج نے حلب میں بیرل بموں سے حملہ کیا۔ سیریئن آبزرویٹری فار ہیومن رائٹس کے مطابق شامی حزب اختلاف کے زیر کنٹرول شہری علاقے پر حکومتی فضائیہ کے حملے میں پندرہ شہری جاں بحق ہوگئے۔ آبزرویٹری کا کہنا ہے کہ حملے میں چار خواتین اور گیارہ بچے لقمہ اجل بنے، حملہ حلب کے علاقے باب النیرب میں کیا گیا۔ شامی باغیوں کا کہنا ہے کہ انھوں نے ترک سرحد کے قریب واقع قصبے جرابلس پرسے داعش کاقبضہ ختم کرالیاہے۔ حالیہ چند دنوں کے دوران حلب میں کم از کم ایک سو تیس عام شہری ہلاک ہو چکے ہیں اور تاحال جاری لڑائی کی وجہ سے ہسپتالوں، چھوٹے شفا خانوں اور بجلی اور پانی کی فراہمی کے نظام کو شدید نقصان پہنچا ہے۔ حلب کبھی شام کا کاروباری دارالحکومت تھا اور اسے اپنی فن تعمیر اور آثار قدیم پر ناز تھا لیکن پانچ سال سے جاری جنگ میں اس کی بیشتر چیزیں تباہ و برباد ہو چکی ہیں یا لوٹ لی گئی ہیں۔