خبرنامہ

اسلام آباد (ملت + اے پی پی) وفاقی وزیر منصوبہ بندی و ترقی احسن اقبال نے اسلام آباد میں اقتصادی تعاون تنظیم کے سربراہ اجلاس کو تمام ممالک کے ساتھ کامیاب سفارتی تعلقات کی بہترین مثال قرار دیا ہے۔ جمعرات کو ذرائع ابلاغ سے بات چیت کرتے ہوئے انہوں نے کہا کہ چین پاکستان اقتصادی راہداری منصوبے اور گوادر پورٹ سے پاکستان وسطی اور جنوبی ایشیائی ملکوں کے مغربی ملکوں کے ساتھ بھی تجارتی اور کاروباری روابط کے فروغ کیلئے اہم ملک بن جائے گا۔ وفاقی وزیر نے کہا کہ اسلام آباد میں اقتصادی تعاون تنظیم کے سربراہ اجلاس کے کامیاب انعقاد سے ثابت ہو گیا ہے کہ پاکستان عالمی برادری میں تنہا نہیں ہے بلکہ وہ ترقی پذیر ملکوں کے شانہ بشانہ کام کر رہا ہے۔ انہوں نے کہا کہ خطے میں امن، ترقی اور خوشحالی کے فروغ کیلئے پاکستان کلیدی کردار ادا کرنے کی صلاحیت رکھتا ہے۔ انہوں نے کہا کہ وقت کا تقاضا ہے کہ پاکستان اور اقتصادی تعاون تنظیم کے رکن ممالک خطے میں باہمی روابط کے فروغ کے ذر یعے ترقی اورخوشحالی کیلئے مل کر کام کریں۔