خبرنامہ

اسلام آباد (ملت + اے پی پی) وفاقی وزیر جہاز رانی و بندرگاہیں سینیٹر میر حاصل خان برنجو نے کہا کہ جنرل راحیل شریف کا بطور کمانڈر افواج پاکستان دہشت گردی کے خاتمے میں کردار قابل تعریف ہے ،وزیر اعظم ہوں، آرمی چیف یا چیف جسٹس آف پاکستان ہوں سب کو اپنے عہدوں کی آئینی مدت پوری کرنی چاہیے اس سے ادارے مضبوط ہوں گے۔ منگل کو پارلیمنٹ ہاؤس کے باہر میڈیا سے بات چیت کرتے ہوئے وفاقی وزیر میر حاصل خان برنجو نے کہاکہ آرمی چیف کی طرف سے ملازمت میں توسیع نہ لینے کافیصلہ خوش آئند اور مثبت ہے، ہم سمجھتے ہیں وزیر اعظم ، آرمی چیف ، چیف جسٹس سب کو اپنی آئینی مدت پوری کرنی چاہیے۔ انہوں نے کہاکہ ایسے عمل سے ادارے مضبوط ہوں گے اور ملک میں انتشار اور بد امنی کا خاتمہ ہو گا اور ملک ترقی کرے گا ۔ انہوں نے کہاکہ آپریشن ضرب عضب ایک اہم فیصلہ تھا جو جنرل راحیل نے شروع کیاگو کے حکومت کا کردار سب سے زیادہ رہا لیکن بطور کمانڈر افواج پاکستان جنرل راحیل شریف کی دہشت گردی کے خاتمہ کے لئے کوششیں قابل تعریف ہیں۔