خبرنامہ

حکومت نے ملک و قوم کا پیسہ ملکی تعمیروترقی پر ہی خرچ کیا؛ مفتاح اسماعیل

اسلام آباد؛(ملت آن لائن) مشیر خزانہ مفتاح اسماعیل نے کہا ہے کہ پاکستان مسلم لیگ (ن) کی حکومت نے ملک و قوم کا پیسہ ملکی تعمیروترقی پر ہی خرچ کیا ہے جس کی بدولت آج ملک ترقی و خوشحالی کی راہ پر گامزن ہو چکا ہے‘ 2013ء میں جب محمد نواز شریف وزیراعظم بنے تو ملکی معیشت کا کافی برا حال تھا لیکن ہماری قیادت نے ملکی معیشت کے استحکام کے لیے مثبت اور ٹھوس اقدامات اٹھائے اور اس وقت ملکی مارکیٹ جو کہ 19 ہزار پر تھی اسے بڑھا کر 54 ہزار تک لے گئے کیونکہ ہم نے اس ملک میں بہت زیادہ وسائل پید اکیے، سی پیک جو کہ ایک گیم چینجر منصوبہ ہے اسے بھی پاکستان مسلم لیگ (ن) ہی کی حکومت نے شروع کیا جبکہ ملک میں جاری توانائی کے بحران کا خاتمہ بھی ہم ہی نے کیا ہے، سابق وزیراعظم محمد نواز شریف کے شروع کردہ توانائی کے منصوبوں کی تکمیل سے ملک میں سے بجلی بحران ختم ہونے جا رہا ہے اور اب ملک میں بجلی وافر مقدار میں موجود ہے جبکہ گیس کے مسئلے پر بھی کافی حد تک قابو پالیا گیا ہے۔ ان خیالات کا اظہار انہوں نے گزشتہ روز پی ٹی وی کے ایک پروگرام میں گفتگو کرتے ہوئے کیا۔ انہوں نے کہا کہ سابق وزیراعظم محمد نواز شریف کی نااہلی کے فیصلے سے ملکی تعمیروترقی کے سفر میں خلل تو پڑا ہے لیکن ہم محمد نواز شریف ہی کی پالیسیوں پر عمل پیرا ہو کر ملکی تعمیرو ترقی کے سفر کو جاری رکھے ہوئے ہیں۔ انہوں نے کہا کہ ملک میں معاشی استحکام کے لیے سیاسی استحکام بہت ضروری ہے، سیاسی عدم استحکام کی وجہ سے معاشی استحکام متاثر ہوتا ہے۔ ایک سوال کے جواب میں انہوں نے کہا کہ گزشتہ سال ہماری جی ڈی پی کی شرح 5.3فیصد تھی جو گزشتہ 11 سالوں میں سب سے زیادہ تھی اور انشااللہ اس سال ہم کوشش کریں گے کہ یہ جی ڈی پی کی شرح 6فیصد تک چلی جائے اور اسے مزید بڑھاتے بھی رہیں گے۔ مشیر وزیراعظم کا کہنا تھا کہ سی پیک بہت اچھے وقت میں آیا اور چین نے اس وقت ہمارے ملک میں سرمایہ کاری کی جب یہاں کوئی بھی سرمایہ کاری کے لیے تیار نہیں تھا۔ انہوں نے کہا کہ پاکستان مسلم لیگ (ن) نے جب بھی اقتدار سنبھالا ملک و قوم کی خدمت کی اور اس دوران ملک نے ترقی ہی کی۔ انہوں نے کہا کہ ہمیں قوی یقین ہے کہ انشااللہ سال 2018ء گزشتہ سال کی نسبت بہت بہتر ہو گا۔ ایک اور سوال کے جواب میں انہوں نے کہا کہ گزشتہ تقریباً6 ماہ سے ہماری ایکسپورٹ میں مسلسل اضافہ ہو رہا ہے جو خوش آئند ہے۔ مفتاح اسماعیل کا کہنا تھا کہ پاکستان پیپلز پارٹی کے گزشتہ دور حکومت میں ایک مزدور کی تنخواہ میں صرف 2 ہزار روپے کا اضافہ کیا گیا تھا جبکہ پاکستان مسلم لیگ (ن) کے موجودہ دور حکومت میں مزدور کی تنخواہ کو ساڑھے آٹھ ہزار سے بڑھا کر پندرہ ہزار کر دیا گیا ہے جو کہ تقریباً ساڑھے چھے ہزار اضافہ بنتا ہے۔ انہوں نے کہاکہ مزدور کی تنخواہ میں اتنا اضافہ کبھی 10 سال میں بھی نہیں ہوا جتنا پاکستان مسلم لیگ (ن) کی حکومت نے اپنے ان 5 سالوں میں کیا ہے۔ انہوں نے کہا کہ ہمارے ملک میں ایک مزدور کی کم سے کم تنخواہ جنوبی ایشیاء کے دیگر ممالک سے زیادہ ہے۔