خبرنامہ

سینیٹ انتخابات: الیکشن کمیشن 2 فروری کو شیڈول جاری کرے گا

اسلام آباد:(ملت آن لائن) الیکشن کمیشن سینیٹ انتخابات کے لیے شیڈول 2 فروری کو جاری کرے گا۔ 11 مارچ کو 104 میں سے سینیٹ کے 52 ممبران ریٹائرڈ ہو رہے ہیں جن میں پنجاب اور سندھ سے 12،12،خیبرپختونخوا اور بلوچستان سے 11،11 سینیٹرز ریٹائر ہورہے ہیں۔ پیپلز پارٹی کے 26 ممبران میں سے 18 سینیٹرز، مسلم لیگ (ن) کے 27 میں سے 9 سینیٹرز ریٹائر ہورہے ہیں جب کہ اسلام آباد سے 2 اور فاٹا سے بھی 4 سینیٹرز ریٹائر ہوجائیں گے۔ ذرائع کے مطابق ایم کیوایم کے طاہرمشہدی، نسرین جلیل اور فروغ نسیم بھی ریٹائر ہونے والوں میں شامل ہیں جب کہ اسحاق ڈار، نزہت صادق، کامران مائیکل، ذوالفقارکھوسہ اور نثارمیمن بھی ریٹائر ہوجائیں گے۔ سینیٹ انتخابات کے لیے آراو اور ڈی آر او کےناموں کوحتمی شکل دے دی گئی ہے، فاٹا کی 4 نشستوں پر انتخاب کے لیے ایڈیشنل ڈی جی الیکشن کمیشن بطور ریٹرننگ افسر تعینات ہوں گے جس کا نوٹی فکیشن جاری کردیا گیا ہے۔ واضح رہے کہ الیکشن کمیشن نے سینیٹ انتخابات 2015 کا شیڈول 19 جنوری کو جاری کیا تھا۔