خبرنامہ

شہباز عملی انسان ہیں، وہ مسلم لیگ (ن) کو آگے لے کر جائیں گے، اعجاز الحق

اسلام آباد(ملت آن لائن) مسلم لیگ (ضیاء) کے سربراہ رکن قومی اسمبلی اعجاز الحق نے کہا ہے کہ مسلم لیگ (ن) کی شناخت میاں نواز شریف ہیں، شہباز شریف ان کے چھوٹے بھائی ہیں، وہ میاں نواز شریف کے بیانیے کو آگے بڑھائیں گے،سیاست میں تشدد قابل مذمت اقدام ہے۔ بدھ کو پارلیمنٹ ہاؤس کے باہر میڈیا سے گفتگو کرتے ہوئے انہوں نے کہا کہ مسلم لیگ (ن) کی شناخت میاں نواز شریف ہیں، شہباز شریف ان کے چھوٹے بھائی ہیں، وہ میاں نواز شریف کے بیانیے کو آگے بڑھائیں گے۔ جب دونوں بھائیوں کی سیاست میں فرق کے حوالے سے پوچھا گیا تو انہوں نے کہا کہ میاں نواز شریف جذباتی جبکہ شہباز شریف دھیمے مزاج کے سیاستدان ہیں، شہباز عملی انسان ہیں، وہ مسلم لیگ (ن) کو آگے لے کر جائیں گے۔ جوتے چلنے کے بارے میں ایک سوال کے جواب میں اعجاز الحق نے کہا کہ سیاست میں تشدد قابل مذمت اقدام ہے، پہلے خواجہ آصف بعد میں میاں نواز شریف اور اب عمران خان، جو بھی اس کے پیچھے ہے اگر یہ راستہ نہ رکا تو وہ بھی اس کی زد میں آئے گا اس لئے اس سلسلے کو یہیں روکنا ہوگا۔