صارفین کی شکایات کا ازالہ اور ان کے حقوق کا تحفظ حکومت کی اولین ترجیح ہے، رانا افضل
اسلام آباد:(ملت آن لائن) وزیر مملکت برائے خزانہ رانا محمد افضل نے کہا ہے کہ عوام کو سہولت فراہم کرنے کیلئے صارف حقوق سے متعلق آگاہی پیدا کرنا ضروری ہے، صارفین کو ان کے حقوق فراہم کرنے کیلئے قانون پر عملدرآمد یقینی بنانے کی ضرورت ہے، صارفین کی شکایات کا ازالہ اور ان کے حقوق کا تحفظ حکومت کی اولین ترجیح ہے۔ ان خیالات کا اظہار انہوں نے جمعرات کو کنزیومر رائٹس کمیشن آف پاکستان کے زیراہتمام قومی کانفرنس سے خطاب کرتے ہوئے کیا۔ انہوں نے کہا کہ حکومت صارفین کے حقوق کی فراہمی کیلئے کنزیومر رائٹس کمیشن آف پاکستان سے ہرممکن تعاون کیلئے تیار ہے۔ انہوں نے کہا کہ صارفین کے حقوق انسانی حقوق کا اہم جزو ہیں۔ انہوں نے کہا کہ صارفین میں اپنے حقوق سے متعلق آگاہی پیدا کرنی چاہئے جبکہ صارفین کو ان کے حقوق کی فراہمی یقینی بنانے کیلئے آئین پر عملدرآمد یقینی بنانے کی ضرورت ہے۔ رانا محمد افضل نے کہا کہ ملک کو انتہا پسندی، دہشت گردی، معاشی کساد بازاری اور بجلی بحران کا سامنا تھا لیکن موجودہ حکومت نے ان تمام چیلنجز پر قابو پایا ہے۔ انہوں نے کہا کہ جمہوریت انسانی حقوق کی ضامن ہے، یہ عوام کے ووٹ کے احترام کا نام ہے، لوگوں کو بااختیار بنانے کا مطلب عوام کو اپنی مرضی سے زندگی گذارنے کے مواقع فراہم کرنا ہے، تاریخی طور پر ہم بادشاہت سے ڈکٹیٹرشپ اور پھر جمہوریت کی جانب آئے۔ رانا محمد افضل نے کہا کہ انسانی حقوق اور صارف کے حقوق کے بارے میں معاشرہ ہی جدوجہد کر سکتا ہے، کنزیومر رائٹس کمیشن آف پاکستان صارفین کے حقوق کے تحفظ کیلئے مؤثر اقدامات کر رہا ہے۔ انہوں نے عوام پر زور دیا کہ وہ جب بھی کہیں سے خریداری کریں تو اس کی انوائس ضرور حاصل کریں کیونکہ یہ آپ کا قانونی حق ہے اور اس انوائس کے ذریعے آپ اپنے خلاف ہونے والی زیادتی کے خلاف قانونی چارہ جوئی کر سکتے ہیں۔ رانا محمد افضل نے کہا کہ صارفین سے اضافی قیمت وصول کرنے والے اور ناقص اشیاء فراہم کرنے والے عوام کے حقوق پر ڈاکہ ڈال رہے ہیں اور یہ غریب عوام کو لوٹ رہے ہیں۔ انہوں نے کہا کہ صارفین کے حقوق سے متعلق شعور اجاگر کرنا کنزیومر رائٹس کمیشن آف پاکستان کی ذمہ داری ہے، سوشل میڈیا زندگی کے دیگر شعبوں میں اہم کردار ادا کر رہا ہے اور وہ صارف میں شعور اجاگر کرنے میں بھی اہم کردار ادا کر سکتا ہے۔ انہوں نے کہا کہ ہم جمہوری اقدار اور صارف کی حوصلہ افزائی کرکے اس لوٹ مار کی روک تھام کر سکتے ہیں۔ رانا محمد افضل نے کہا کہ صارف کی شکایات کا ازالہ اور حقوق کا تحفظ ہماری اولین ترجیح ہے۔ انہوں نے کہا کہ ہمارے ملک میں ہر شعبہ موجود ہے لیکن دیکھنا یہ ہے کہ وہ کس طرح اپنا کام کر رہا ہے، ہمیں اپنے اداروں میں خامیوں کا جائزہ لے کر اور انہیں دور کرکے آگے بڑھنا ہوگا۔ انہوں نے کہا کہ اگر ہم پاکستان کو ترقی یافتہ اور خوشحال بنانا چاہتے ہیں تو اس کیلئے ہمیں ملک کے غریب ترین افراد کے انداز زندگی کو قابل احترام بنانا ہوگا۔ انہوں نے کہا کہ ہمیں کاروباری مقامات پر دہشت پیدا کرنے کی بجائے آگاہی کے ذریعے صارف کے حقوق کا تحفظ کرنا چاہئے۔ انہوں نے کہا کہ ملک میں بدعنوانی اور اقربا پروری کا ہونا بدقسمتی ہے، لوگوں کو بااختیار بنانا ہمارے لئے بڑا چیلنج ہے۔ اس موقع پر کنزیومر رائٹس کمیشن آف پاکستان کی سیکرٹری اقبال حفیظ بھی موجود تھے۔