خبرنامہ

اسلام آباد: (ملت+اے پی پی) وزیراعظم کے مشیر برائے قومی تاریخ و ادبی ورثہ عرفان صدیقی نے وفاق المدارس العربیہ پاکستان کے صدر شیخ الحدیث مولانا سلیم اﷲ خان کے انتقال پر گہرے رنج و غم کا اظہار کیا ہے۔ مرحوم کے صاحبزادوں مولانا عادل خان اور عبید اﷲ خان کے نام تعزیتی پیغام میں مشیر وزیراعظم عرفان صدیقی نے کہا کہ مولانا سلیم اﷲ نے دین کی ترویج و اشاعت کیلئے گراں قدر خدمات انجام دیں۔ اتحاد مدارس دینیہ اور وفاق المدارس العربیہ کے سربراہ کی حیثیت سے انہوں نے دینی مدارس کے نظم اور ان کی علمی سرگرمیوں کے فروغ میں اہم کردار ادا کیا ہے، ان کی وفات سے ایک بڑا خلا پیدا ہو گیا۔ عرفان صدیقی نے دعا کی کہ اﷲ تعالیٰ مرحوم کو جنت الفردوس میں اعلیٰ مقام دے اور لواحقین کو صبر جمیل عطا فرمائے۔