خبرنامہ

اسلام آباد (ملت آن لائن + آئی این پی) وفاقی وزیر ریلوے خواجہ سعد رفیق نے کہا ہے کہ عمران خان اداروں پر بے جا دباؤ ڈالنا بند کریں، عمران خان پارٹی فنڈنگ کیس سے راہ فرار اختیار کررہے ہیں ، چوری نہیں کی تو الیکشن کمیشن میں تحریری جواب دیں، عمران خان دوسروں کو نصیحت اور خود میاں فصیحت کی مثال ہیں ۔ پیر کو اپنے ایک بیان میں خواجہ سعد رفیق نے کہا کہ پارٹی فنڈنگ کیس میں التواء کے حربے استعمال کیے جا رہے ہیں ۔ پارٹی فنڈنگ کیس میں عمران خان راہ فرار اختیار کر رہے ہیں ۔ یہ کیس پانامہ کیس سے پہلے کا زیر سماعت ہے ۔ انہوں نے کہا کہ عمران خان اپنے خلاف ٹھوس مقدمات میں حیلے بہانے نہ کریں ۔ انہوں نے چوری نہیں کی تو الیکشن کمیشن میں جواب دیں ۔ ان سے جواب مانگا گیا تو ان کو اختیار سماعت یاد آگیا۔ وزیر ریلوے نے کہا کہ عمران اداروں پر دباؤ ڈالنا بند کریں ۔ اداروں کو بلاجواز تضحیک کرنے والے اداروں کے سامنے جواب دیں ۔ عمران خان دوسروں کو نصیحت اور خود میاں فصیحت کی مثال ہیں ۔ وہ جس کام کی توقع دوسروں سے کرتے ہیں وہ خود بھی کرکے دکھائیں ۔ جھوٹ اور گالم گلوچ عمران کی سیاست کا حصہ ہے ۔ پارٹی چندے کے نام پر فنڈ اکٹھے کرکے عیاشی کرنے کا حساب دینا پڑے گا ۔ رنگے ہاتھوں پکڑے جانے والے عمران خان سرجھکا کر قوم سے معافی مانگیں.