خبرنامہ

عمران خان فتووں سے پہلے اپنے گریبان میں جھانکیں، رانا محمد افضل

اسلام آباد(ملت آن لائن) وزیر مملکت برائے خزانہ رانا محمد افضل نے کہا ہے کہ عمران خان فتووں سے پہلے اپنے گریبان میں جھانکیں، سابق گورنر پنجاب کیلئے کتنے ووٹ خریدے، سینٹ انتخابات میں مسلم لیگ (ن) ایوان میں سب سے بڑی جماعت بن کر سامنے آئی ہے، 33 ووٹوں سے 54 ووٹوں کا سفر دوسری جماعتوں سے کم ہے، جمہوریت و سیاست میں ہر چیز ممکن ہے۔ پیر کو پارلیمنٹ ہاؤس کے باہر میڈیا سے گفتگو کرتے ہوئے وزیر مملکت نے کہا کہ سینٹ کے انتخابات میں جس جماعت نے ہارس ٹریڈنگ نہیں کی اس حوالہ سے بات نہیں ہو رہی ہے، ہم ایک ذمہ دار پارٹی ہیں، ہارس ٹریڈنگ کا سوچ بھی نہیں سکتے، سوال یہ ہے کہ ایسے حالات کیوں پیدا ہوئے جس کی وجہ سے ہارس ٹریڈنگ ہوئی۔ رانا افضل نے کہا کہ سینٹ انتخابات میں مسلم لیگ (ن) سب سے بڑی جماعت بن گئی ہے اور چیئرمین سینٹ مسلم لیگ (ن) کا ہی ہو گا، مسلم لیگ (ن) کا 33 ووٹوں سے 54 ووٹوں کا سفر دوسری جماعتوں سے کم ہے۔ وزیر مملکت نے کہا کہ عمران خان اپنے گریبان میں جھانکیں، وہ دوسروں کے خلاف تو فتوے دیتے ہیں مگر انہوں نے سابق گورنر پنجاب کیلئے کتنے ووٹ خریدے ہیں، دو سیٹیں کم ملی ہیں۔ رانا افضل نے کہا کہ جمہوریت و سیاست میں ہر چیز ممکن ہوتی ہے، اگر نواز شریف نے ہاتھ بڑھایا تو آصف زرداری کو بھی ہاتھ بڑھانا چاہئے مگر آصف زرداری نے آج کل کلف لگائی ہوئی ہے، انہیں اس سے باہر نکلنے کی ضرورت ہے۔ ایک سوال کے جواب میں وزیر مملکت نے کہا کہ مسلم لیگ (ن) چیئرمین سینٹ کیلئے مشاورت کر رہی ہے، قائد ایوان راجہ ظفر الحق، سینیٹر پرویز رشید اور سینیٹر مشاہد اﷲ خان کا نام بھی چیئرمین سینٹ کے امیدوار کے طور پر سامنے آئے ہیں۔