خبرنامہ

اسلام آباد: (ملت+اے پی پی) سابق وفاقی وزیر سینیٹر مشاہد اللہ خان نے کہاکہ ہے کہ پاکستان دو سال کے اندر دنیا کے 25 ترقی یافتہ ممالک کی صف میں شامل ہو گا ، عمران خان کی امریکا میں دو مزید آف شور کمپنیاں سامنے آچکی ہیں ان کے گرد گھیرا تنگ ہو چکا ہے۔منگل کو پارلیمنٹ کے باہر میڈیاسے گفتگو کرتے ہوئے انہوں نے کہاکہ آج کی رپورٹ کے مطابق پاکستان ترقی کی دوڑ میں بھارت سے آگے نکل چکا ہے ملکی ترقی کے اعداد وشمار مثبت نظر آرہے ہیں ، چین پاکستان اقتصادی راہداری منصوبے سے ملکی معیشت مزید مضبوط ہو گی جبکہ منصوبے سے عوام کو روزگار کے مواقع میسر آئیں گے اور غربت کی شرح میں کم ہو گی ۔ انہوں نے پاکستان مسلم لیگ اور وزیر اعظم کی کوششوں سے ملک دو سال کے اندر دنیا کی25ترقی یافتہ ممالک میں شامل ہو گا۔ انہوں نے کہاکہ عمران خان یو ٹر ن کے بادشاہ ہیں صبح کو کچھ اور شام کو کچھ کہتے ہیں،کل انہوں نے الیکشن کمیشن میں تحریری طورپر معافی مانگی ہے جبکہ امریکا میں ان کی دو نئی آف شور کمپنیاں سامنے آگئی ہیں ان کے گرد شکنجہ کس دیا گیا ہے ، عمران اپنی کمزوری اور خفت مٹانے کے لئے دوسروں پر الزام لگا رہے ہیں ۔ انہوں نے کہاکہ عمران خان کے ملازمین کے نام پر لوگوں کے خیرات اور زکوٰۃ کے پیسے ہیں ۔ انہوں نے الیکشن کمیشن میں تین وکیل بدلے ۔ انہوں نے شروع شروع میں لوگوں کو گمراہ کیا اب لوگ اصل حقائق جان چکے ہیں ۔ انہوں نے کہاکہ عمران خان اپنے آپ کو بالاتر سمجھتے ہیں۔صوبہ کے پی کے میں کوئی ترقی نہیں ہوئی ۔ ایک سوال کے جواب میں انہوں نے کہاکہ اگر وزیر اعظم کو استثنیٰ ہے تو استثنیٰ لینا چاہیے اس میں کوئی حرج نہیں ہے۔