خبرنامہ

قومی اسمبلی کی قائمہ کمیٹی برائے حکومتی یقین دہانیاں کااجلاس

اسلام آباد(ملت آن لائن) قومی اسمبلی کی قائمہ کمیٹی برائے حکومتی یقین دہانیاں کااجلاس پارلیمنٹ لاجز میں کمیٹی کے چیئرمین عبدالمجید خان خانان خیل کی زیرِ صدارت منعقد ہوا ۔ ایگزیکٹو ڈائریکٹر پمز نے کمیٹی کو بتایا کہ گذشتہ سال سرجیکل I۔C۔U میں داخل مریضہ سے غیر اخلاقی حرکت کرنے پر میل نرس کے خلاف سخت قانونی کارروائی عمل میں لائی گئی اور مالی جرمانہ اور معطل کرنے کے ساتھ ساتھ اسکے خلاف باقاعدہ مقدمہ درج کیا گیا ہے اور ملزم اس وقت جیل میں ہے۔ مزید یہ ہے کہ پمز نے پرائیویٹ وکلا ء کی خدمات بھی اسی سلسلہ میں حاصل کر لی گئی ہیں۔ انہوں نے مزید بتایا کہ آئندہ اس طرح کے گھناؤنے افعال کی روک تھام کے لئے مؤثر اقدامات کئے گئے ہیں۔ جسکے تحت تمام نرسنگ سٹاف کے لئے بائیو میٹرک اور ان کی آن لائن مانیٹرنگ بذریعہ کیمرہ شروع کی گئی ہے۔ نیز کسی بھی خاتون مریضہ کی دیکھ بھال کے لئے مکمل طور پر میل نرسوں کی ڈیوٹی ختم کر دی گئی اور تمام فی میل سٹاف ہی خواتین کی خدمت انجام دیں گی۔ اسلام آباد میں واقع سرکاری سکولوں کے حوالے سے وزیر مملکت برائے کیڈ طارق فضل چودھری نے کمیٹی کو بتایا کہ تمام سرکاری سکولوں میں عمارتوں کی تزئین و آرائش ، صاف پانی کی فراہمی کے نظام کو بہتر کیا گیا ہے۔ اور اسی حوالے سے 200 سکولوں میں کام جاری ہے۔ مزید 200 کے قریب سکولوں میں آئندہ ماہ کام شروع ہو جائے گا۔ اور مضافاتی علاقوں میں نئے سکولوں کی تعمیر بھی کی جائے گی۔ انہوں نے کمیٹی کو بتایا کہ اساتذہ کی بھرتی اور انکی پروفیشنل ٹریننگ کو بھی لازمی قرار دیا گیا ہے اور اس وقت اسلام آباد کے سکولوں کی حالت باقی صوبوں کے سرکاری سکولوں سے بہتر ہے۔ وزیرِ مملکت برائے صحت محترمہ سائرہ افضل تارڑ نے کمیٹی کو بتا یا کہ لیبارٹریز اور میڈیکل اسٹور کے لئے باقاعدہ ریگولیشن کا بل تیار ہو گیا ہے اور آئندہ قومی اسمبلی کے اجلاس میں پیش کیا جائے گا۔ انہوں نے مزید بتایا کہ ملک بھر میں ڈرگ مافیا کے خلاف نیب اور ایف آئی اے کے ساتھ ملکر کارروائیاں کی گئی ہیں نیز اسلام آباد میں بھی میڈیکل اسٹور اور لیبارٹریز کی غیر قانونی سرگرمیوں کے خلاف ڈرگ انسپکٹرز کے سا تھ ملکر کارروائی کی گئی ہیں اور انہیں پابند کیا ہے کہ بغیرنسخہ ادویات فروخت نہ کی جائیں۔ پاکستان میں اب عالمی ادارہ صحت کے معیارات کے مطابق قوانین بنائے جارہے ہیں جسکے بعد اب پاکستانی ادویات ترقی یافتہ ممالک میں بھی ایکسپورٹ کی جارہی ہیں۔ کمیٹی نے سید والا کے مقام پر دریائے راوی پر پل کی تعمیر کے حوالے سے سب کمیٹی تشکیل دے دی ہے۔ جو کہ محترم ملک ابرار احمد، محترمہ شہزادی عمر زادی ٹوانہ اور چوہدری منیر اظہر صاحب پر مشتمل ہوگی۔ اجلاس میں کمیٹی کے ارکان شہزادی عمر زادی ٹوانہ ، ممبر، چوہدری محمد منیر اظہر ، ممبر ، ملک ابرار احمد،ممبر، عبدالحکیم بلوچ،ممبر، مولانا محمد خان شیرانی ، ڈاکٹر شذرا منصب سمیت متعلقہ سرکاری اداروں کے افسران نے شرکت کی۔