خبرنامہ

مسلم لیگ (ن) کے حوصلے بلند ہیں؛ مشاہداللہ
اسلام آباد: (ملت آن لائن) وفاقی وزیر موسمیاتی تبدیلی سینیٹرمشاہداللہ خان نے کہا ہے کہ مسلم لیگ (ن) کے حوصلے بلند ہیں اور ابھی تک سابق وزیر اعظم نواز شریف اور مسلم لیگ (ن) کے کارکنوں سمیت کسی کو بھی یہ سمجھ نہیں آرہی کہ انہیں کن گناہوں کی سزا دی جارہی ہے۔ منگل کو احتساب عدالت کے باہر میڈیا سے گفتگو کرتے ہوئے انہوں نے کہا کہ یہ کرپشن کا کیس نہیں ہے اور اس کا ثبوت یہ ہے کہ سپریم کورٹ نے نوازشریف کو کرپشن کی بجائے اقامہ پر سزا دی ہے، وہاں سے انہیں کلین شیٹ بھی مل گئی ہے۔مشاہداللہ خان نے کہا کہ ہماری نظر میں نواز شریف نے جو گناہ کئے ہیں وہ یہ ہیں کہ نواز شریف نے پاکستان کا وقار بلند کیا ، پاکستان سے اندھیروں کو مٹایا ،دہشت گردی کو ختم کیا ،سڑکیں بنائیں،موٹرویز بنائے، ایئرپورٹ بنائے،سٹاک ایکسچینج ،جی ڈی پی اور تمام اکنامک اشاریے مثبت ہیں اور اسے ساری دنیا مانتی ہے۔
مسلم لیگ (ن) کے رہنما طلال چوہری کا کہنا ہے کہ سسٹم کو پٹری سے اتارنے کے لئے کہانیاں بنائی جارہی ہیں جبکہ سی پیک منصوبہ خطرے میں پڑگیا ہے۔ رہنما مسلم لیگ (ن) طلال چوہدری کا کہنا تھا کہ نئی حلقہ بندیوں سے ہماری جماعت کی سیٹیں کم ہو رہی ہیں لیکن ہمیں کوئی مسئلہ نہیں، ہمارا مؤقف ہے نئے انتخابات نئی مردم شماری کے مطابق ہونے چاہئے لیکن لوگوں کو مجبور کیا جارہا ہے کہ وہ آئینی ترمیم کا حصہ نہ بنیں اور اس سلسلے میں لوگوں سے براہ راست اور بالواسطہ طور پررابطے کئے جارہے ہیں۔ ان کا کہنا تھا کہ ابھی بھی ہم گرینڈ ڈائیلاگ کی صورت لوگوں کو بلا رہے ہیں،انہیں دلاسے دیے جا رہے ہیں کہ انہیں کچھ نہیں کہا جا ئے گا نئی حلقہ بندیوں میں چھوٹے صوبوں کو ان کا حق دیا جارہا ہے۔طلال چوہدری نے کہا کہ عمران خان کو تو پہلے ہی مشرف کی ویکسین لگی ہوئی ہے لگتا ہے اب پیپلزپارٹی کو بھی لگ گئی ہے، یہ لوگ رات کو ہر بات پر رضامندی کا اظہار کرتے ہوئے اور صبح ہوتے ہی اپنی بات سے مکر جاتے ہیں۔ سسٹم کو پٹڑی سے اتارنے کے لیے کہانیاں بنائی جا رہی ہیں سازشی عناصر کی وجہ سے سی پیک منصوبہ خطرے میں پڑ گیا ہے اس سسٹم کو نہ چلانے کا نوازشریف کو نقصان نہیں ہو گا۔ ان کا کہنا تھا کہ سابق وزیراعظم کو صرف اصولوں پر کھڑے رہنے کی وجہ سے مشکلات کا سامنا کرنا پڑ رہاہے، بوگس کیسوں کا سامنا ہے جس میں بے شمار تحفظات بھی ہیں لیکن یاد رکھیں کہ ہم نے تو کچھ نہیں کیا پھر بھی عدالتوں میں کھڑے ہیں۔